لغز الهيْمنه : انا اللي هيباته تليق بجنابه ( مرفوع )

[{ أبوفيصل }]

السلام عليكم ورحمة الله وبركاته

انــا اللي كـلـي فالمخـالـيـق هـيـبـه = وأنــا الـلـي هيبـاتـه تلـيـق بجنـابه
من هـيبتي ذيـب السّــرَب ينسريبـه = حوّل من المشراف خـوف ومهابه
واللي على المرقـاب راس الجذيبه = يقـنـب قنـيـبـه فـــوق رجـمٍ عـوابه
هيْمـنْـت ومثـلـي مـايـحـب الغلـيـبـه = لاشفت ضـوْل الجمـع وش ينبغابه
أشـوم عـن بعـض البقايـا وأسيـبـه = ولا يجـي مـن بيـن ضرسـي ونابه
هـذا وانـا اللـي مـن يمـاري بطيـبه = ازداد بـخـيــار الـقــسـوم ونـصابه
واقــول انـــا الـــي مـاتـردا نصيـبه = ياللي قريـت اللغــز عطني جـوابه

.

[همس النسيم]

يالعطاوي عدل اللغز وقرب الأبيات لبعض
بعيدة عن بعض واجد
لاهنت

[{ أبوفيصل }]

والله ياسيدة الألغاز مدري وش حاصل للتنسيق

حاولت باللي اقدر عليه وتم التنسيق

[همس النسيم]

و عليكم السلام ورحمة الله وبركاته
صح لسانك يالعطاوي
ولاهنت
وش تقول بالشجاعة

[اصايل]

صح لسانك

شرايك في الكرامه

وعزة النفس ؟؟

[فوفو الطنايا]

لغز طيب تسلم يالعطاوي
اللغز هل هو روح ولا جماد
اذا كان روح هل هو الكلب ..,

[فوفو الطنايا]

او الجيب نوع في اكس ار ْ

[عهود]

يعطيك العافيه على اللغز ياالعطاوي


وش رايك بــ الصقر

[{ أبوفيصل }]

هلابكم وحياكم الله جميعاً

اصايل + فوفو + عهود

مالتسن لوا وخيرها في غيرها

[فوفو الطنايا]

تسلم يالعطاوي
بس حبيت توضح لنا نبي نتشجع ونفكر
بين لنا هو روح ولا جماد فقط واترك الباقي علينا

طيب وش تقول بالاسد