بنتك..لآعوى الذيب(ذيبه)

[تباريح الروقي]

يابـوي جعلـك للبقـا والمكاسيـب



عمري بدونك يالذرا ويش أبـي بـه





يابوي تسأل عـن شفـاك المراقيـب



طلعـة سواتـك للنّوايـف غريـبـه





ليه المرض مايعرف الزّين والعيـب ؟



مايـدري انـك للمخاليـق هيبـه !!





أبسألك وش به غزا وجهـك الشيـب



والقلـب لايـع والنواظـر شحيـبـه





وش بك تحاتي لانوى الموت تغريـب



تخشـى علينـا بالليّالـي الكئيـبـه





خذ دلّتك واركى على مسنـد الجيـب



وعطني شماغك بلثمه وأحتمـي بـه





ونروّح لأرض ٍ بها العشب والطيـب



وتسمع كـلام ٍ يالغـلا تحتفـي بـه





يابـوي بنتـك لاانحكـى بالتّجاريـب



كل ٍ يشـق لهيبـه الصّيـت جيبـه





يابوي ماني من سـوات المخاريـب



اللّـي تجيـب لعليَـة القـوم خيبـه





وماني من اللّي لامشت حفّها الرّيـب



أنـا مـن اللّـي مايدنّـس حليـبـه





مرفوع شاني عـن غـرام المكاتيـب



وأكبر من انّنـي أرتضـي بالحبيبـه





أنـا غرامـي لاابتـدوا بالتّراحـيـب



نفوس الأوادم فـي وجـودي رحيبـه





وان كان زينـي فتنـة ٍ للمصاويـب



أحـط وجهـي بالحريـق ولهيـبـه





زيني أبيعه وأشتري سمعـه الطّيـب



اسم ٍ ينومس بالصّـروح الـذ ّهيبـه





وان كان عندي ( بالحلا) شي ٍ اصعيب



عنـدي جـدود ٍ مارضـت بالغليبـه





دموع القبايـل فـي لقانـا مساكيـب



كـن المقابـر لاحضـرنـا قريـبـه





خضّبت لك كفّي من العـز تخضيـب



ورفعـت راسـي للنّجـوم الصّعيبـه





والله لأسـدّك بالفعـول المصالـيـب



والله لأشيلـك بالرخـا والمصيـبـه





طلع المعالـي ماانحكـم للشّواريـب



بنت ٍ وأناطح فـارس القـوم طيبـه





وياشيخي إبشـر لوتـدور الدّواليـب



بنتك إلا منّه عـوى الذّيـب ( ذيبـه)

[اصايل]

طلع المعالـي ماانحكـم للشّواريـب



بنت ٍ وأناطح فـارس القـوم طيبـه





وياشيخي إبشـر لوتـدور الدّواليـب



بنتك إلا منّه عـوى الذّيـب ( ذيبـه)



الله الله


صح ايرادك وذوقك تباريح

لاهنتي

[تباريح الروقي]

اصايل\ ششاكرة لك مرورك دومتي بصحةة وعاافيةة

[وجودك يكفي]

صح لسان شاعرها ولاهنتي ياتبااريح على النقل الرائع


احترامي

[تباريح الروقي]

وجوودك يكفي....ششاكرة لك مرورك دومتم بصحةة وعااافيةة

[الأدميرال]

تباريح نقلتي فابدعتي واحسنتي الاختيار قصيده جميله وتستحق التقييم

[تباريح الروقي]

الادميرال,,,, الله يعافيك يشرفنئ مرورك,,اخجلتني,,,ع التقييم

دومتم بصحةة وعااااااااااافيةة

[الطرف الحنون]

طلع المعالـي ماانحكـم للشّواريـب



بنت ٍ وأناطح فـارس القـوم طيبـه



صح لسان شاعرها

ولاهنتي اختي المميزه

ع النقل الفاخر

بارك الله فيك

[راس الطويله]

بنتك إلا منّه عـوى الذّيـب ( ذيبـه)

تسلمين ع النقل .

[جـــلادة]

صح لسان شآعرها
ولاهنتي عزيزتي ع الطــرح

تحيآتي ،،،