السكن مع اهل الزوج موضوع يحتاج للنقاش

[امير الغلا]

السلام عليكم ورحمة الله وبركااته

موضوع بسيط بس مهم ونبي تفاعلكم معه

الموضوع هو السكن عند أهل الزوج ....من المؤيد ومن المعارض

اذا تزوجة هل ستسكن زوجتك مع اهلك ام لا اذا كانت الأجابه بالا برر

لماذا وهل الزوجه اذا عرض عليها زوجها ان تسكن مع اهله

هل ترفض ام توافق

[امير الغلا]

الله يعافيك ياسلايل انا اقصد هل اذا تزوجت تسكن زوجتك مع اهلك

ومن ناحية الزواج والله مانقصني شي بس باقي بنت الحلال الي الحين ماجت
هههههههههههههه


انتضر ردك اخوي

[امير الغلا]

مواضيعي عن الزواج مالي حيله من الأبتدائيه وانا ابي الزواج هههههه

طيب يعني انت من المؤيدين ان الزوجه تسكن مع اهلك

يعطيك العافيه اخوي وننتضر رد الأخوان الأعضاء

[دلع عيني]

هلا بك يا الأمير وبمواضيعك اللي بدب فيكم فيها هههههههههههههه

سنكون واقعيين ولا أحد يعارضني ولا يناقشني <<<<<قولي قسم ههههههههههههههه إسمع يا الأمير أنت وأخوي القدير سلايل المجد
إذا هذا شرطكم بتبطون عظم ماقيتوا زوجة ترضى الدنيا تغيرت والبنات اللي كانت قطة مغمضة فتحت وطلع لها أظافير ومخالب بعد <<<<<أخلصي خلي الفلسفة عنا أها

أهلنا زمان أول كانت زوجة الولد عندهم بمثابة الإبنة وتجي تستلم البيت بدال بنتهم إللي تزوجت يحول وراحت تخدم في بيت أهل زوجها
هذي وظيفة زوجة الإبن قديماً بعد أن تكون زوجة ومنجبة للأولاد ولا تكل ولا تمل ولا تشكي
وكانت نظرأم الزوج لزوجة الإبن أنها تجب عليها خدمة أهل الزوج قسراً لا طوعاً وكرماً منها لدرجة إن أحد العجائز تقول لزوجة إبنها إنك إذا لم تسمعي كلامي بجي يوم القيامة أجرتس بقرونتس وأجدعتس (وأحذفك) بالنار !!!!!!!!!

أما الآن فنظرت أم الزوج وأخواته مازالت هي هي الأغلبية يريدون
زوجة خادمة لهم وتابعة لهم ولرغباتهم
لكن زوجة الإبن عرفت مكانتها وموقعها من الإعراب وأنها مسؤلة عن بيتها وعن زوجها وأولادها فقط وماغير ذلك فهو كرمٌ منها
إن كانت تريد الذكر الطيب والأجر من الله
وأنا من معارضين سكن الزوجة مع الأهل ولا أبي أحد من أولادي يسكن معي لأني صراحة مثل الفريك ما بحبش شريك بيتي أحب أتحرك فيه على راحتي ويكون لي مطلق الحرية في التصرف فيه
ولا أحد يملي علي فيه أوامر وأضف على ذلك أني أحب أن يكون لي خصوصيتي الخاصة في لبسي ,اكلي وكلامي وكل شي ولا تكون كل حركاتي وسكناتي مراقبة ومحسوبة علي والمثل يقول -----
وعساها سعيدة لو هي بعيدة
هذا وصلى الله على نبينا محمد أفضل الصلوات والتسليم

[امير الغلا]

سلمتي اختي اذا كان علي لاوربي ماارضى ان اسكن زوجتي في بيت واحد

مع اهل البيت يعني احط لها غرفه مثلآ في البيت حرااااام

كذا ماتاخذ راحتها البنت ولاارضاها ابد بس كلآ ونضرته بس

انها مثل ماقلتي تكون خادمه مااعتقد ان في ناس كذا

او في رجل بمعنى كلمة رجل يرضى ان بنت الناس تنهان

تطلع من بيت اهلها معززه تعيش عندي معززه مكرمه

ومشكووره اختي على تفاعلك مع موضوعي

[دلع عيني]

المشاركة الأصلية كتبت بواسطة امير الغلا سلمتي اختي اذا كان علي لاوربي ماارضى ان اسكن زوجتي في بيت واحد مع اهل البيت يعني احط لها غرفه مثلآ في البيت حرااااام كذا ماتاخذ راحتها البنت ولاارضاها ابد بس كلآ ونضرته بس انها مثل ماقلتي تكون خادمه مااعتقد ان في ناس كذا او في رجل بمعنى كلمة رجل يرضى ان بنت الناس تنهان تطلع من بيت اهلها معززه تعيش عندي معززه مكرمه ومشكووره اختي على تفاعلك مع موضوعي

ههههههههههههه أمير كثر الله من أمثالك
لكن الكلام اللي انا كتبته صدقني كتبته من واقع خبرة ومعايشة
شرايك أمس صديقة لي والله من أفضل البنات ولا أزكي على الله أحد إبتليت بأهل زوج من هالنوعية ولم تستطع أن تكمل معهم المشوار فقطعت علاقتها معهم بسبب كثرة الإهانات منهم والتعدي على كرامتها أمس إتصلت تقول لي كنت في عزيمة وتهجموا عليها
أخوات الزوج بأن ضربوها أخوات الزوج أما الحاضرين
وأما م أطفالها ؟؟؟؟!!!!!!!!!!!!
لاتقول ما تصدق والله إنها حقيقة
وأنا أرى اللي يتزوج و مضطربيسكن مع أهله
أنه يجعل للزوجة شقة مسروقة من بيت العائلة أو جناح خاص ويوفر لها مدخل ومخرج خاص فيها لمنعاً للإحراج لها
مو يحطها في غرفة وممكن يكون الحمام مشترك بعد كنها في فندق
وهذا كله درأً للمشاكل والحساسيات اللي تحصل وستحصل مادام مجتمعنا بهذه العقليات
مالهم هم إلا يراقبون فلانة وفلتانة بس هذا أكبر همهم
وشاكرة لك ومقدرة

[إبن ثعلي]

الرجل اللي تفرق زوجته بينه وبين اهله لاخير فيه ولاخير في الزوجه التي تبعد زوجها عن اهله واذا كان البيت كبير ويسع الجميع فلماذا تخرج في بيت جديد وتحمل زوجها تكاليف جديده اما اذا كان البيت ضيق فبامكانهم البحث عن بيت قريب من اهل الزوج او اهل الزوجه اذا كانوا في حاجه الى خدمتها وليس لهم غيرها يعني لازم يكون التراحم موجود بين العائلتين اللتين قربهما النسب 0

[ولد الأحرار]

شكرا اخوي علي الموضوع

انا شخصيآ لا اويد السكن مع الاهل لاسباب كثيرة , وابذكر سبب واحد

يمكن يكون اهمها وهو انك متي تبي تعتمد علي نفسك وتشيل المسولية

اذا سكنت مع اهلك ؟

[دلع عيني]

المشاركة الأصلية كتبت بواسطة بن مكرز شكرا اخوي علي الموضوع انا شخصيآ لا اويد السكن مع الاهل لاسباب كثيرة , وابذكر سبب واحد يمكن يكون اهمها وهو انك متي تبي تعتمد علي نفسك وتشيل المسولية اذا سكنت مع اهلك ؟

صدقت رحم الله والديك وكله كوم وإذا بغا يروح يمين ويسار وقالت أبي اطلع ودني على طريقك لأهلي قال لا إجلسي عندك أهلي
وهذا خطأ يقع فيه كثير من الأزواج

[بدويه...وافتخر]

يعطيك العافيه امير الغلا ...

موضوع رائع يلامس واقعنا ...

وانا اضم صوتي لك امير الغلا وكذلك دلع عيني ...

انا ارفض قطعيا ان اسكن مع اهله .. موكبرياء او ابي افرق بينه وبين اهله لا وربي بس اذا ما ابي اخسر حياتي الزوجيه واكون سعيده فيها... بعيده عن المشاكل .. اسكن لوحدي ...
لان السكن مع الاهل يولد المشاكل ..

لان الام تبدأ بالغيره على ابنها .. فترى كيف يعامل زوجته ..
وكيف يخرج معها .. من هنا تنطلق المشاكل ...
كثير بنات تطلقوا من ازواجهم بسب مشاكل الاهل والبيت .. لماذ نجعل انفسنا عرضه لذلك ..

والزوجه تريد انت تأخذ حريتها الشخصيه في منزلها .. وتريد ان تستقر ...

انا اعتبر السكن لوحدها من حقوق الزوجه ولها الحق ان تطالب بذلك
... او تجعله احد شروط زواجها ..

هذي وجهت نظري مع احترامي لجميع وجهات النظر ..

سلمت يمناااك امير الغلا ...
الله يرزقك بلي تسعدك وتملئ عينك ...