☺طفـــــــــــولة عضـــــــو / عضــــــــوهـ ☺

[اصايل]

المشاركة الأصلية كتبت بواسطة الأدميرال 4) ماهي المواقف التي عرضت فيها اهلك للاحراج؟؟ المواقف كثيره بس كان اقوى شي كان الوالد الله يرحمه مسوي غداء للامير سلطان بن محمد الكبير وكان ايامها توي طايح بالنبيلات وكنت وقتها فاالشارع انبط على حمامه واقفه على سلك فوق البيت على طلعت ابوي والامير والريجيل معه سبحانه اختارته النبطه من بينهم كلهم وهي توقع في راسه اللي اذكره ذيك اللحظه انها قامت عجه عند الباب وانا انحاش لى بيت لخوالي اخذ عندهم اسبوع وطلع سليم منها ما جته الارضه ولا طلع دم سلم منها ههههههههههههه لزوم نبلغ الشيخ 7) اكبر مغامره قمت فيها وانت صغير..؟؟؟ اكبر مغامره كانت سرقه وكانت اول مره واخر مره كان عمري 8 سنوات قمت مره الصباح بدري وجاء في بالي اروح الدكان/ ذاك الوقت اقول دكان معرف اسم البقاله وانا بطريقي لدكان واشوف باب جيرانا مفتوح والوبر فالحوش يناقز وانااقرب من الباب ودخل راسي معه وطالع يمين يسار مافيه احد كلهم رقود وشوف اللعشه حقت الوبر يسار فالحوش وانا ادخل وخذ ثنتين وروح للبيت وحطها ورجع مره ثانيه واخذ ثنتين ورجع وفالمره الاخيره على دخلتي فالحوش لاهاك البنت واقفه عند باب المدخل تناظر في توها صاحيه من النوم وهي صغيره وانا ابتسم ورجع مع دربي وكفخ للبيت يوم جاء العصر فيه ملعب دايم نلعب فيه فالحاره المهم وحنا نلعب وهي تطلعلي مثل ابليس قدام وجهي وتقول هذا هو اللي سرق الوبر حقنا واخوانها يلعبون معي بس اشوى محد سمعها وانا انسحب بكل هدووء من الملعب وعلى البيت يوم جاء المغرب ويجينا ابوهم يشتكي على ابوي واخذ تكفيخ هاك اليوم لين اذنت يوم جاء من بكره وشوف الولد واخته جاين من البقاله وانا اجيهم وامسك اخوها وانا اضربه وخته تقعد تبكي واخذ اغراضهم اللي هم شارينها وكبها بس الي الان كل ماذكرتها تندمت وش ابي فيهم:sniper (71): خخخخخ تذكرت سعيدان وعليان يوم يصاحبون مصطفى انواااتي عشان الزعتر واللبنه 8) من هو الشخص اللي يقع دائمأ في شر اذيتك..؟؟؟ ههههههههههههههههه ازقور التركي كان يعملون عندنا ابوه وامه وكان حياة ابوي الله يرحمه ماخذلهم بيت قدام بيتنا عشرة عمر بينا وبينهم وكان هو الضحيه دايما كانت ام ازقور تطبخ طبخ وكنت اجيهم على حزة غداء اوعشاء يعنني ادور ازقور بس عشان اكل معهم بطاطس وسمك وسلطات>>>> كان فيه خير ونعمه عندنا بس ليه احب اكلهم مدري والمعلم ازقور الان فاتح حلاق بالعليا وهو حلاقي المفضل ياعزتي له ازقور هع 9) يوم كنت صغير كنت تترأس عصابه ام انك كنت عضو فيها فقط؟؟ مستحيل كان احد يتراسني كنت انا المدبر في كل شي:sniper (90): مدير اتراااك 11) اســم دلعك بالطفوله لحد الان ينادونك فيـه ؟؟ وماهو ؟؟ مافيه اسم دلع بس كانت الوالده لاشفت وجهي متغير وحست اني جايب مصيبه كانت تقول/ وش عندك ياسمين العلوم:sniper (54): علينا ومافيه عياره مثلا 13) هـل كـنت تـعانـي مـن اخـطاء فـي مخـارج الحـروف ..؟ مرذوق اذرم هههههههههه هذي انا متاكده منها لاتحاول تقول ااااذرم خخخخخ 14) يوم كنتي صغير/ هـ وش هي تسريحتك المفضلة ؟؟ قصة الاسد كانت مشهوره ذاك الوقت هههههههههه وتوليت اووما التوليت كنت تحط بلكريم الاخضر هههه 15)أشياء ودك تذكرها عن طفولتك؟ وكان حلمي اسوق تريله ياااه ع الحلم الحين وودك بــــ ببنتلي

طفوله ممتعه الادميرال

طولة العمر على طاعة يارب وبعيده عن تكفيخ ازقور وامثاله

[مهـرة مـطير]

الله على الطفولة البريئه ي الادميرال


بس ينخاف منك حتى الأمير ماسلم منك

وشنو ذنب البنت واخوها كسروا خاطري

يعطيك العافيه يالادميرال أمتعتنا بسردك لـ طفولتك الغير

[مهـرة مـطير]

بـإنتظار ولد ثابت

[تباريح الروقي]

الله يذكر<<بطاطس ام ازقوور بالخير ههههههههههههههههههههههههههههه>والله خطيرين,,الادميرال ينبط خلق الله واصايل تكسر دخان هههههههه

:)) بشوق لولد ثابت >>تحس انه زعيم..


مهررة(تراني متربعه فيذا)

[مهـرة مـطير]

هههههههههههههههه شفتي يا تباريح طلعوا ربعنا اللي بالدّكه مو هيْنيين


حياج الله يَ تباريح بأي وقت واكيد جايك الدور بعد :)

[وجودك يكفي]

يالادميرال اجل كان حلمك تسوق تريله>>الله يستر عليك وعلى حلمك ياشيخ ههههههههههههههههه


استمتعت بحديثك يارفيقي وأيام طفولتك الحلوه بس لو الوبر سلم وبقى عندك ياسلام ههههههههههههههه






انتظروني ويمكن اتأخر عليكم

[الأدميرال]

المشاركة الأصلية كتبت بواسطة مهـرة مـطير وشنو ذنب البنت واخوها كسروا خاطري

اللقافه والله كل ماذكرتها حزت بخاطري

المشاركة الأصلية كتبت بواسطة تباريح الروقي الله يذكر<<بطاطس ام ازقوور بالخير ههههههههههههههههههههههههههههه>والله

اووووه عليها طبخ ام ازقور مير الحين معها زهايمر الله يشفيها

المشاركة الأصلية كتبت بواسطة وجودك يكفي يالادميرال اجل كان حلمك تسوق تريله>>الله يستر عليك وعلى حلمك ياشيخ ههههههههههههههههه استمتعت بحديثك يارفيقي وأيام طفولتك الحلوه بس لو الوبر سلم وبقى عندك ياسلام ههههههههههههههه انتظروني ويمكن اتأخر عليكم

اي والله كان حلمي اسوق تريله وكان عندي كيس كبير اجمع فيه السيارات
وتعال شف كيف ارتبها
اجيب الضومنه وسويها على شكل معارض ودخل السيارات فيها وانواع السوالف مع نفسك
ههههههههههه

ننتظرك لاتتأخر اجمع ذكريات الطفوله ونثرها هنا خلنا نشوف طفولتك كيف عشتها

[وجودك يكفي]

1/نشيد كنت تحبه أيام الطفوله
ماكنت اسمع انشايد ولا اعرفها وكنت اسمع اغاني ههههههه واذكر الاغنيه اللي دايم اسمعها . اغنية مفرح الضمني . واذكر من كلاماتها .
قبل امس العشيّه.قرب العباسيّه.لقتني بنيّه.نضرتها قتاله
وقفت السياره.والعين محتاره.قلبي شب بناره .والنار شعاله
قلتلها ياغزيّل.ميّل يمي ميّل.قالت يامتحيّل..كلٍ على فاله

واذكر ان الشريط خرب وابلشت الوالد لين رحت انا وياه للسوق وشرالي شريط جديد وكان لونه ابيض واصفر . ويوم إلتزم اكبر اخواني منع الاغاني ومدري وين راح شريطي

شخصيه كرتونيه كنت تحبها؟
سندباد وعلي بابا وعدنان وعبسي وتوم سوير وصديقه هاك وعقلة الأصبع الاقزام الثلاثه

كيف كانت ايام طفولتك شيطاني ولامؤدب
على حسب الظروف والطبع مقرود وشيطاني واحيان اصير مؤدب واحسن واحد غصبٍ عني ههههههههههه

ماهي المواقف اللي عرضت اهلك للاحراج؟
اذكر اني عرضت الوالد والوالده للخطر وخوفتهم في موضوع تافه وبسيط>>كان الوالد والوالده خارج البيت وكنت انا واخواني في البيت واختي الصغيره راحت للمطبخ وانتثر على يدها مويه حاره وبكت شوي وسكتت وماصار فيها شي وبعدها بشوي كلّم الوالد على التلفون الثابت لأن هاك الحين ماكان فيه جولات . اتصل عشان يتطمن علينا ورديت على التلفون واول ماسمعت صوته وعرفت انه الوالد قلت>>يبه وينكم فيه؟؟قال وشفيكم وان ابوك؟؟قلت تعالوا بسرعه بسرعه ريم احترقت...
وعلى طول قفل الخط وبعدها بربع ساعة او اقل إلا يوم دخلوا علينا وأمي تبكي وتقول وين ريم وين ريم ؟؟ ويوم ناظروا إلا حنا جالسين عند التلفزيون وريم منسدحه قدام التلفزيون وتتابع هههههههه
قال ابوي ياولدي انت وش سويت فينا . بغيت تذبحني انا وامك والله ماوقفت عند اشاره ولاحاسبت في اي شارع وامشي بسرعه مامشيتها في حياتي والحمدلله ان اختك طيبه ومافيها شي ولاعاد توعودها وانا ابوك

هل كنت ذو شخصيه قويه ام مغلوب عليك
اقرب مالها الأولى

موقف حصل في طفولتك كان له دور في تغيير مجرى حياتك
ههههههههه غير مجرى حياتي وانا طفل>>ايه فيه موقف غير مجرى حياتي>>كنت اربي حمام وحاطهم فوق السطح والحمام كان لي انا واخوي سلطان(سلطان اكبر مني بسنه) وكانت الوالده شارطه شرط انا مانطلع للسطح وقت الظهر عشان الشمس ماتضربنا وعشان ماتغير اشكالنا . وفي البدايه كنا نطبق الشرط وبعد فتره تهاونا وصرنا اربع وعشرين ساعة متكين في السطح . وفي يوم من الايام العصيبه في حياتي رحت انا وسلطان لعشة الحمام ويوم دخلنا العشه لقينا الحمام كله مذبوح وبغينا ننهبل من هول الموقف . واذكر اني لقيت راس الغندي [الغندي]كنت احبه واغليه من بد الحمام وشلت راسه وقمت ابكي وقول ياسلطان الغندي مات مااااات وسلطان يبكي معي وحالتنا كانت تكسر الخاطر وجلسنا فتره وحنا متأثرين من السالفه هذي>>الوالده ذبحت الحمام ومنعت تربية الحمام وتغير مجرى حياتنا من بعد المذبحه اللي صارت ومعاد ربينا حمام
اكبر مغامره قمت فيها وانت صغير
اكبر مغامره وتهور قمت فيه وانا صغير اني كنت اطب من عماره تبنا في الحاره وكان فيه تحت العماره زبره ولعبتنا انا نطلع للدور الثاني ونطب على الزبره وفي يوم من الايام تهورت ورقيت سطح العماره وقلت بطب من السطح وقالوا يامجنون لاتطب تروح فيها . وفعلاً طبت وحطمت الرقم القياسي هههههههههه

من هو الشخص اللي يقع في شر اذيتك
سلطان اخوي لأنه دايم معي . واذكر مره رحنا لبوفيه فيها يماني وطلبنا ساندويش(صموني) وقمنا نزمر وننفخ على اليماني وطردنا من البوفيه ويوم طلعنا قمنا نحذفه وكسرنا قزاز البوفيه اللي داخل . وانحشنا واليماني يلحقنا ونشوفه ورانا بس ندري انه مايقدر يجيبنا لأنا كنا سريعين وما احد يسبقنا ههههههههه وبعدها شفناه وقف عن مطاردتنا واختفى وقمنا نمشي على راحتنا>>اثر اليماني يراقبنا من بعيد يبي يعرف بيتنا>>ويوم وصلنا للبيت كانوا اهلي رايحين للدمام وحنا في حي الخبر..ماكان معنى مفتاح للبيت وكان الوقت اخر العصر ندري انهم بيجون المغرب من الدمام>>رحت انا وسلطان وجلسنا على زبره جنب البيت وقمنا نلعب وندفن رجلينا في الرمل وكان وجهي بإتجاه البيت وسلطان ملقي ظهره للبيت ويوم رفعت راسي إلا واشوف اليماني واقف عند الباب ويدق الجرس>>قلت سلطان شف شف .. وحنا نروح له ونحذفه ونقول انقلع انقلع يابويمن وش تبغآ>>ويوم درى إن البيت مافيه احد راح عشان ماتجيه فلقه من التحذيف هههههههههههه
يوم راح انبسطنا ونحسب انه معاد هو راجع .
الوكاد جوا اهلي من الدمام وجلسنا في البيت وقبل صلاة العشاء بشوي دق الجرس ورحت انا وسلطان نشوف من عند الباب ولقينا اليماني قلنا وش تبي الله يقلعك انقلع>>قال فين ابوكم ويوم حاولنا نكرشه علّق على الجرس وحنا نقول بس بس لاتدق الجرس>>وجاء الوالد وقال وشفيه>>اليماني قص القصه على ابوي وقال له الوالد رح صلّح البوفيه وجب لي فاتورة التصليح والخساير وانا اعوضك وأعطيك الفلوس اللي خسرتها>>ابوي زعل علينا وطالبنا بس الحمدلله ماضربنا هاك اليوم

يوم كنت صغير كنت تترأس عصابه ام انك كنت عضو فيها
اذا كان سلطان موجود يكون هو الرئيس وانا مساعد الرئيس واذا سلطان ماهو موجود اصير الرئيس هههههههههههه ((وللمعلوميه ترى سلطان اخوي موجود معنا في المنتدى هنا))بس ماني معلمكم وش معرّفه والنك حقه

اسم دلعك بالطفوله لحد الان ينادونك فيه ؟وماهو؟
مافيه اسم دلع بس اذكر ابوي يناديني ((الحوسه)) لأني كنت اخرّب المكان اللي اجيه واقلب عفشه واحوسه فوق حدر

من كان يدلعك اكثر أبوك أو أمك؟؟
ما أسميه دلع . ولكن اقول الوالد والوالده ماقصروا ابد في تلبية طلباتي واحتياجاتي وانا وجميع اخواني. وما اذكر اني طلبت شي وردوني عسى الله يحفظهم ويعطيهم طولت العمر ويرزقني برّهم وطاعتهم ورضاهم .

بطفولتك كنت تبكي اذا ماجلست بالاول بالطابور او الفصل؟؟
لا ماكنت ابكي واذكر ان مكاني في اول ابتدائي كان ثاني كرسي من عند الباب

هل كنت تعاني من أخطاء في مخارج الحروف
ابداً ابداً وبالعكس كنت انطق جميع الحروف بالشكل الصحيح وكما ينبغي

يوم كنت صغير وشهي تسريحتك المفضله؟؟
ههههههههههههههه كنت اقرع . وفيه صور قديمه تشهد على ذلك بس اسمحولي ما اقدر اوريكم منها ولاصوره.. والفتره اللي بعد القرعه كانت الحلاقه تواليت

اشياء ودك تذكرها عن طفولتك
فيه اشياء كثير بس من ضيق الوقت بذكر سالفة ((المزهريه والأسد)) وبقول لكم السالفه بإختصار:
كان في غرفة النوم مزهريتين كبار وراح اتكلم عن وحده والكلام نفسه ينطبق على الثانيه
اذا جاء وقت النوم وطفأ نور الغرفه يكون الباب مطرّف شوي ويجي منه نور حاجه بسيطه كنت اذا طولت النظر في المزهريه اشوفها تنقلب وتتحوّل أسد>>أسد حقيقي اشوفه قدام عيني وكنت اخاف واتعذب من هالاسد اللي يخوفني كل ليله وماكان أحد يدري ولحد الحين مالقت الكلام هذا لأحد من أهلي وحتى سلطان ماعلمته بسالفة المزهريه والاسد..لأني ماكان ودي احد يعرف منهم اني اخاف هههههههههههه
من جد كنت اعاني كل ليله من هالمزهريه وكنت انتظر متى الاسد يهجم عليّ وانا منسدح في سريري. والمشكله في مراقبة المزهريه انهن كانن مزهريتين ومرّه اراقب هذي وانتظر الهجوم المباغت ومرّه اراقب المزهريه الثانيه وياليل ماطولك مع هالأسدين اللي في الغرفه ومايدري عنهم إلا انا وعلى بالي كافشهم وحاسب حسابهم وماخذ الحيطه والحذر منهم وغيري مادرى عنهم.
ومن التعب ارقد واذا قمت الصباح وناظرت في المزهريات مالقيت لا اسد ولاحتى قطو ولا فيه وجه شبه اصلاً بين المزهريه والأسد هههههههههههههه
واقول في نفسي الليله ماراح اتخليل المزهريه اسد بس اذا طفى النور تغيّر الكلام وبدأ التخيل ومراقبة الأسدين.
انتهت سالفة المزهريه والأسد .



وأخيراً وقبل النهايه اقول:
نحمد الله عز وجل الذي رزقنا بوالدين كانوا هم السبب بعد الله في جمال أيام طفولتنا وبذلوا الغالي والنفيس من أجل سعادتنا . واصبحنا نتحدث عن ايام الطفوله بذكريات جميله فلله الحمد والمنّه ونسأل الله ان يجزي أبائنا وأمهاتنا خير الجزاء وان يرحم ميتهم ويسكنه فسيح جناته ان يطيل عمر الأحياء منهم على طاعته ويرزقنا طاعتهم ورضاهم







لاهنتي يامهرة على الموضوع الرائع . واشكر الأدميرال على الإختيار
..
وبصراحه كان ودي استرسل اكثر في حديثي عن ايام الطفوله ولكن اعرف نفسي لو استرسلت ماوقفت وانتهت مهلة اليومين وانا ماقضيت ههههههههههههه


اختار الاخت تباااريح

[مهـرة مـطير]

المشاركة الأصلية كتبت بواسطة وجودك يكفي اشياء ودك تذكرها عن طفولتك فيه اشياء كثير بس من ضيق الوقت بذكر سالفة ((المزهريه والأسد)) وبقول لكم السالفه بإختصار: كان في غرفة النوم مزهريتين كبار وراح اتكلم عن وحده والكلام نفسه ينطبق على الثانيه اذا جاء وقت النوم وطفأ نور الغرفه يكون الباب مطرّف شوي ويجي منه نور حاجه بسيطه كنت اذا طولت النظر في المزهريه اشوفها تنقلب وتتحوّل أسد>>أسد حقيقي اشوفه قدام عيني وكنت اخاف واتعذب من هالاسد اللي يخوفني كل ليله وماكان أحد يدري ولحد الحين مالقت الكلام هذا لأحد من أهلي وحتى سلطان ماعلمته بسالفة المزهريه والاسد..لأني ماكان ودي احد يعرف منهم اني اخاف هههههههههههه من جد كنت اعاني كل ليله من هالمزهريه وكنت انتظر متى الاسد يهجم عليّ وانا منسدح في سريري. والمشكله في مراقبة المزهريه انهن كانن مزهريتين ومرّه اراقب هذي وانتظر الهجوم المباغت ومرّه اراقب المزهريه الثانيه وياليل ماطولك مع هالأسدين اللي في الغرفه ومايدري عنهم إلا انا وعلى بالي كافشهم وحاسب حسابهم وماخذ الحيطه والحذر منهم وغيري مادرى عنهم. ومن التعب ارقد واذا قمت الصباح وناظرت في المزهريات مالقيت لا اسد ولاحتى قطو ولا فيه وجه شبه اصلاً بين المزهريه والأسد هههههههههههههه واقول في نفسي الليله ماراح اتخليل المزهريه اسد بس اذا طفى النور تغيّر الكلام وبدأ التخيل ومراقبة الأسدين. انتهت سالفة المزهريه والأسد . وأخيراً وقبل النهايه اقول: نحمد الله عز وجل الذي رزقنا بوالدين كانوا هم السبب بعد الله في جمال أيام طفولتنا وبذلوا الغالي والنفيس من أجل سعادتنا . واصبحنا نتحدث عن ايام الطفوله بذكريات جميله فلله الحمد والمنّه ونسأل الله ان يجزي أبائنا وأمهاتنا خير الجزاء وان يرحم ميتهم ويسكنه فسيح جناته ان يطيل عمر الأحياء منهم على طاعته ويرزقنا طاعتهم ورضاهم لاهنتي يامهرة على الموضوع الرائع . واشكر الأدميرال على الإختيار .. وبصراحه كان ودي استرسل اكثر في حديثي عن ايام الطفوله ولكن اعرف نفسي لو استرسلت ماوقفت وانتهت مهلة اليومين وانا ماقضيت ههههههههههههه اختار الاخت تباااريح

هههههههههههه الله يسعدك على هالطفوله المشاغبه و المهوَله والجريئه

عجبتني سالفه المزهريه والاسد مو بعيد عني ام التخيلات حزة النوم

المشكله انك تهون على عمرك وتقول منت متخيل وبعدين تتخيل

الله يحفظ الوالد والوالدة ويطوَل بأعمارهم

والرائع تواجدكم في الموضوع والاروع سردكم لـ طفولاتكم العجييييبه

يعطيك العافيه ي وجودك , طيب سلطان اخوك يمكن يكون التقي النقي الالمو ومخبين علينا

/


بانتظار طفولة تباريح الروقي

[مهـرة مـطير]

المشاركة الأصلية كتبت بواسطة وجودك يكفي 1/ اكبر مغامره قمت فيها وانت صغير اكبر مغامره وتهور قمت فيه وانا صغير اني كنت اطب من عماره تبنا في الحاره وكان فيه تحت العماره زبره ولعبتنا انا نطلع للدور الثاني ونطب على الزبره وفي يوم من الايام تهورت ورقيت سطح العماره وقلت بطب من السطح وقالوا يامجنون لاتطب تروح فيها . وفعلاً طبت وحطمت الرقم القياسي هههههههههه

اسم دلعك بالطفوله لحد الان ينادونك فيه ؟وماهو؟
مافيه اسم دلع بس اذكر ابوي يناديني ((الحوسه)) لأني كنت اخرّب المكان اللي اجيه واقلب عفشه واحوسه فوق حدر

الحوسه