منتدى أخبـــار الشعــر والشــعراء (يختص بأخبار الشعر والشعراء ..والمسابقات الشعريه..ومقابلات الشعراء)

إضافة رد
كاتب الموضوع مخلد بن ماشع مشاركات 4 المشاهدات 2470  مشاهدة صفحة طباعة الموضوع | أرسل هذا الموضوع إلى صديق | الاشتراك انشر الموضوع
قديم 02-14-2011, 12:04 AM   #1
معلومات العضو
Moderator
الصورة الرمزية مخلد بن ماشع
رقم العضوية : 8626
تاريخ التسجيل: Jun 2007
مجموع المشاركات : 164
قوة التقييم : 17
مخلد بن ماشع is on a distinguished road
لقاء مع الشاعر راشد بن مسعد العازمي

بسم الله الرحمن الرحيم

السلام عليكم ورحمة الله وبركاتة








لقاء-حمود بن ماشع: يسرنا ان نعرض لكم هذا اللقاء الخاص الذي اجرته الشبكة مع الشاعر الكبير/ راشد بن مسعد العازمي العتيبي اثناء احدى زيارتنا له بمحافظة عفيف وشاعرنا لما له من مكانه عاليه لدى الجميع يجعل للحديث معه طعماً خاص وهو صاحب ثقافه عاليه في كافة المجالات ومطلع على كم كبير من المعلومات الثمينه التي عادة ما يكتسبها ناتج القراءه والبحث في الكتب الثقافيه التي تعتني بالادب الشعبي وهذا ليس بمستغرب من شاعر له المكانه المرموقه على مستوى القبيلة وصاحب الاسم الذي اذا اطريته تذكر اصول الادب والحكمه والشعر العريق على وجه الخصوص ولقد تشرفنا باجراء هذا الحوار معه حينما كان في ضيافته كلً من الاعلامي الشاعر/ حمود بن ماشع والاستاذ/ مطلق بن خليفه والاستاذ/ مخلد بن ماشع وفي الحقيقه ان اللقاء كان من اجمل اللقاءات ورحابت صدر شاعرنا وتواضعه وحسن ضيافته وكرمه وهذا ليس بغريب على شاعرنا وعلى ابناء هذه القبيله الكريمه ,وحيث يجمع شاعرنا على اكبر قدر من القصائد الجزله والعذبه والمعاني الفريده ولكن ضيق الوقت حال دون ذلك وعلى جمع كل قصائده.

لااطيل عليكم واستعرض لكم بعض ما طرحناه على شاعرنا من تساؤلات :



"شاعرنا / راشد بن مسعد"



س: عرفنا عن نفسك "البطاقة الشخصيه" ؟
ج : الاسم : راشد بن مسعد بن زيدان العازمي العتيبي
من مواليد عام 1370 هـ - مكان الميلاد – ضواحي عفيف– النشأة : البادية
مقر الاقامه حاليا: محافظة عفيف

س: بدايتك مع الشعر ومتى كان ذلك وهل تحفظ اول ابياتك ؟ اوردها لنا ؟
ج: بدايتي في الشعر وكان عمري 17 سنه وأول أبيات نظمتها عندما كنا في الباديه وكنت صغيراً واتمنى أن اتوظف والتحق بالسلك العسكري فقلت هذه الأبيات:

[poem=font=",5,darkred,bold,normal" bkcolor="transparent" bkimage="" border="none,4," type=0 line=0 align=center use=ex num="0,black""]
وأهني اللي كتب ومدربينه = ماقعد عند الغنم طول السنيني
من قعد عند الغنم لازم تهينه = خاسرً يوم النشامى كاسبيني
كل شهر وليا المعاش مفيضينه = يستفيضونه ذريفين اليميني
[/poem]


س: هل كان هناك من يوجهك في بدايتك في مجال الشعر او كان هناك شاعر تجعله منهجه طريقا لك ؟
ج: لا لايوجد احد يوجهني ,بل أنا اوجه نفسي بنفسي ,ولكن يعجبني الشاعر الكبير عبدالمعين الثعلي العضياني وتعجبني قصائده.

س: متى وجد ابو عوض انه شاعر متمكن ؟
ج: بعد بدايتي بالشعر بسبع سنوات، عندما كان عمري 25 سنه.

س: هل كانت بدايتك في شعر الرد " المحاوره " ام في النظم وايهما اقرب اليك ؟ ولماذا ؟
ج : بدائت بكلاهما ولكن أقرب إلي شعر النظم ,لان شعر النظم يخلد ويبقى ذكره حتى بعد مرور السنين والعصور

س: اين تجد شعر المحاوره في الوقت الحالي أوالماضي واين كانت قوته ؟
ج: طبعا شعر المحاوره في الماضي لانه في الماضي معانيه غامضه وقويه.





ونترككم مع احدى قصائده.
قصيدة في صاحب السمو الملكي الأمير/ سلمان بن عبدالعزيز آل سعود

[poem=font=",5,darkred,bold,normal" bkcolor="transparent" bkimage="" border="none,4," type=0 line=0 align=center use=ex num="0,black""]
يامرحبا ميه وتسعين مليون =وبالورد والريحان بعد معموله
بأمير نجد اللي عطى الحق موزون = واليوم نجد منوره من فعوله
خمسين عام في التقدم تزيدون = واليوم احسن دار واعز دوله
واهل عفيف ومن تبعها يهلون = زيارتك ماهيب دعوه سهوله
سلمان يأمير السعد يابيض اللون = ابيض وجه دايم وكلن يقوله
وأنتم عيال العود بالحق تمشون = في ما فرض ربي وسنة رسوله
واللي يعاديكم مجنى وملعون = وملعون من يرضى ومن صار حوله
حسادنا اللي في بلدنا يحسدون = اما بدوا بالشر ولا عملوله
تخسون ياحرابة الشرع تخسون = امفاوتين المرجله ورجوله
وامثالكم ذخر النصارى وشارون = اللي على سفو الدمي معلوله
وحنا محنا بالنصارى تعقبون = حنا بدار اهل الشرف والبطوله
حنا بحكم اللي عساهم يدومون = عيال من حمى الحدود بذلوله
وهيَ منول بين طاعن ومطعون = عاشوبها وقت الجهل والجهوله
جاها وعدلها وفتح لها عيون = وأمست بعد سفي الدمي مغسوله
ووصى عياله بالعداله يعدلون = ومشوا بحكم الشرع على وصوله
أدآ امانة حق في كف مامون = امانةً من عودهم ومحموله
يالله عساه لجنة الخلد مضمون = آمين يامنشي المطر من ثعوله
واهما على حفظ الامانه يحرصون = وسلمان مثل العَود كنه دلوله
هذا الرجل فاهم وفالحق متقون = ومن وقفته كل الرجال شهدوله
ومعدال حق وسيف للي يلفون = والحق شرع الله وعنده كموله
ويالله يالمعبود ياخالق الكون = نخوة كلامً حق عندك قبوله
ياجعل ميتهم من النار مصيون = في جنة الفردوس يثبة نزوله
والحي يبقى لَدير درع وحصون = اللي حدوا عنه العدو ورتكوله
وهذا كلام الصدق والناس يدرون = لكن قول الحق نبى نقوله
[/poem]






"من يمين الاعلامي الشاعر حمود بن ماشع وشاعرنا راشد بن مسعد"



س: يقال ان " الماده لم تدخل شئ الا افسدته " هل تعتقد انها اثرت في الشعر المبالغ الماليه المشروطه من قبل بعض الشعراء لحضور الحفلات والامسيات وما رايك في هذا ؟
ج: كل شخص ورائيه ولكن من ناحيتي لااعتقد انها افسدته لان الشاعر يأتي من مسافات بعيده ويقطع الكيلوات لحظور الحفلات والامسيات ويكلف نفسه فلااعتقد انها تفسده.

س: ما هو موقفك من الشعراء الذين ينزلون بالشعر الى مستوى المهارات والمدح والذم واحياء النعرات الجاهليه ؟
ج: الخطاء لايحبه الله وخلقه ولكن بعض الشعراء يجرون الشاعر إلى شئً لايريده فيجب أن يرد على النار بالنار.

س: في الوقت الحالي بما تنصح الشاعر بالمحاوره ام بالنظم وايهما يخدم الشعر والشاعر ؟
ج: انصح الشاعر بان يتقي الله في نفسه ويعلم بان كل كلمه محسوبه عليه وان يحاول ان يكون عضوا صالحا فى المجتمع وهو على حسب قدرته او رغبته سواء في شعر النظم او المحاوره او أي مجال اخر, لكن في نظري أن شعر النظم يخدم الشعر والشاعر

س: هل من الضروري ارضاء الجماهير على حساب النزول بالشعر الى مستويات غير لائقه ؟
ج: الناس لها غايات لا يدركها احد فعلى الشاعر ان ياخذ الحذر من الوقوع فى الممنوع وان يترفع عن سفايف الامور ولا تأخذه العزة بالاثم وهذا مربط الفرس ولكن الجماهير يجب أن يلقاء لها النظر ولكن ليس بالمهاترات والنزول بمستوى الشعر.

س: كم عدد ابناءك وهل منهم من ينظم الشعر ؟
ج: لدي من الابناء 6 من الرجال وليس فيهم شاعر لحد الان.







وهذه احدى قصائده في الشيخ محمد بن نافل بن محيا رئيس مركز العبل

[poem=font=",5,darkred,bold,normal" bkcolor="transparent" bkimage="" border="none,4," type=0 line=0 align=center use=ex num="0,black""]
يقول من رد ويغني بالالحان = أبيات شعراً على المعنى يرتبها
بعد لفينا محل طوال الايمان = الربعه اللي عزيزاتً مناسبها
راع المثل قال سج الرجل من شان = ماتعرف الناس لين أنك تجربها
ولقيت رجلً كفو في كل الافنان = وعيد الركيب ليا عضت غواربها
دايم يرحب وتلقى البيت مليان = من النشامى وهو كفو لواجبها
يامحمد أنت بقولت نعم كسبان = ومن كبر حظك يبو نايف تفوزابها
راع اللوازم ومنصاها كحيلان = يوم أن بعض العرب ياخذ جوانبها
أمارةً صدق ماهي خبط عشوان = ولاهوب من اللي ورا قبل أمس كاسبها
أبن محيا وجده طير حوران = من ربعةً فعلها يحمى مناصبها
ماهوب خبلً يبي الشيخه وحيران = سوات من يزقع اللقمه وغصبها
ذخر المحيا لهم فالفعل برهان = حتى الحكومه على قولي تقربها
براك يوم الدفينه جاء لها اعلان = بالسيف لين اتعب العدوان واذهبها
وعفاس عفاس في روغات الاذهان = كم قض شيخان قومً من مراكبها
ونهار الانصر وجاء للملح دخان = اخيولهم تطرح الخيل بمناكبها
وابن طواله بعد فعل العرب بان = سوى القصيده واسامي القوم جاكبها
وفعولهم كايده علماً بوكدان = لاكن من كثر ماذكر كيف احسبها
وأقول نعم أبهم من قلب وللسان = عدة نجومً مولعةً كواكبها
الربعه اللي تقدر كل ميزان = وأن شافت الضيف ماصكت حواجبها
وأن عودت للفعول أعز شجعان = وأن عودت للكرم نعمً شواربها
[/poem]



وقصيدة أيضاً في الشيخ محمد بن نافل بن محيا :

[poem=font=",5,darkred,bold,normal" bkcolor="transparent" bkimage="" border="none,4," type=0 line=0 align=center use=ex num="0,black""]
يا راكب اللي ليا نشنش مع العبله = نشناش ندرً علو الأرض ناهبته
هلت بردها ومنشئها من القبله = فاضت تهل البرد والسيل عقبته
وسميتً هل ماها وانصرم وبله = حتى علو الوطى بالسيل سالبته
جميع نزلً تمره خلته حبله = دوب أن راع الدبش ينحاش برقبته
امثل اللي ليا من انطلق سبله = يطوي الصحاري طوي ماهيب متعبته
وأن لمسه ترستً ثقلها الدبله = عوى عوا اللي ضراي البدو جنبته
واللويل له صوت والسكان يلعب له = كن الحصاء ضرب غشنه من تحت سبته
وأن طب له رملةً بالترس يسحب له = ترس الدبل يطلعه ماهيب منشبته
ومن جربه سوق غيره مايناسب له = وغلاه عند الرجال اللي مجربته
أفخر ماورد ماهوب صناعةً خبله = وينومس الشركه اللي جات جالبته
ابتعبه يم شيخً لين يتعب له = من ربعتً بالشجاعه قبل ناسبته
وملفاك شيخً ليا شافه يرحب له = اللي بطبخ الغنم يتعب معزبته
مايمسكه قدمه ماهوب حاسب له = ونتشت هروج القفى ماهيب قاربته
من منصبً صدق ماهوب يتنصبله = ومن سمعتً عاليه ماهيب ذاربته
ابن محيا وهذا الاسم يحسب له = ماهو بخبلً يبا السمعه وناكبته
واوصفلك الدرب ياللي تاتجاوب له = أن كان وليا أن عند البيت ماجبته
أن كان ماهوب عند البيت عند أبله = يبرى لوضحً بكثر الحب جاذبته
ومن حيث طاح الحياء تصليحها شبله = موفاً مواجيبها وهي مشببته
سجل ياسلطان هاك البوك واكتب له = كلمة نعم عد رش النو مع نبته

[/poem]





"من يمين الاعلامي الشاعر/ حمود بن ماشع و شاعرنا / راشد بن مسعد وفواز بن تراحيب "








س: لماذا انت بعيد عن الاعلام وعن ساحة المحاوره والامسيات الشعريه ؟
ج: من يعرف الماضي لا يجهل الحاضر فقد امضيت حوالي 45 عام في مجال الشعر من نظم ومحاوره ولكن لاأحب الاضواء ولاأحب افرض نفسي على الاعلام ومن أتى لي فيبشر بالذي يريده .

س: هل الاعلام يخدم الشاعر ؟
ج: نعم الاعلام يخدم الشعر ويبرز الشاعر وله دور رئيسي في شخصية أي فرد ولكن من الواجب ان الاعلام لا ينشر الا ما يفيد المجتمع من شعر او غيره.

س: نصيحه توجهها للشعراء الشباب ؟
ج: الشباب هم صرح الحاضر والمستقبل والنصيحه ان يحافظون على عاداتهم وتقاليديهم الحميده والابتعاد عن ظليمت الناس ويقول الحق ولو على نفسه .

س بيت شعر تردده ؟
ج: بيوت كثيره ارددها لي ولشعراء كثر ولكن لي بيت اردده دائما وقصته أتاني في احد الايام شاب وقال لي أنك شايب فقلت قصيدة ومنها هذا البيت الذي اردده دائما:

[poem=font=",5,darkred,bold,normal" bkcolor="transparent" bkimage="" border="none,4," type=0 line=0 align=center use=ex num="0,black""]
حتيش لو شيبت ياورع ملام = الشيب نورً للوجيه النقيه
[/poem]


س: من الشعراء المعاصرين لك والذين شاركتهم في مجال النظم والمحاوره؟
ج: شعراء كثيرون فمنهم على سبيل المثال :
1- مستور العصيمي
2- حبيب العازمي العتيبي
3- فارع الصيده المطيري
4- رشيد بن مناع العازمي " رحمه الله "
5- فيحان القعياني المطيري
6- مذكر الحليوي العازمي
7- معيض الموسمي المطيري





وأيضاً هذه قصيدة في الشيخ سلطان بن ناصر الشغار

[poem=font=",5,darkred,bold,normal" bkcolor="transparent" bkimage="" border="none,4," type=0 line=0 align=center use=ex num="0,black""]
سلام يابيتً على العز مبناه = بيت الرجال اهل الكرم والشهامه
سلطان بن ناصر عسى الآش يفداه = ذخر الشجيع الي رفيعً مقامه
مرحوم ياعودً كثيره سجاياه = منه الشجاعه والكرم والفهامه
وعقَب لنا سلطان من صلب مجناه = ويحيى الجمل مدام ينبت سنامه
هذا محل الجود هذاه مواه = للي رحل واللي بدا بستلامه
وياللي تبي سلطان موجود تلقاه = على المعزه ماشيً بهتمامه
تحصل النادر ويعجبك ملفاه = ويعجبك بالترحيب والابتسامه
وقال الزلامي يوم غنى بمعناه = يكفيك في الرجال منطق كلامه
وسلطان سلطان السعد لاعدمناه = النعم كفو له ويلبس وسامه
ويا اهل الركيب الي من السج محفاه = قد اتعبو والليل قرب ضلامه
هسو على اللي تذخر النعم يمناه = ومحصله من فعل ابوه وعمامه
قضاية الآزم على كل مجهاه = سقم العدو والزائر اله احترامه
وريف الضيوف وكل علمً بمجراه = ماعاش في سوق البخل والرخامه
وراع الكرم والدين والعزم والجاه = ومن جاه ماهو راجعً بالندامه
وابوه خطار العشاء ماتعداه= ونعم ليا صاحوا وطش العمامه
ومن قابل الشغار ماهوب وياه = يبشر بسيفً ماش عقبه سلامه
أهل الكرم وأهل الخيول المحذاه = لاجاء نهارً مثل يوم الرغامه


[/poem]




"من اليمين / مخلد بن ماشع وشاعرنا الكبير/ راشد بن مسعد"



س/ ماذا يعني لك كل من :
بندر بن سرور القسامي (رحمه الله) : شاعر حكيم وعلم من اعلام الشعر وكل قصائده حكم ومثل رحمة الله عليه.
عبدالله بن عون الرويس : شاعر حكيم أيضاً ومن أفضل الشعراء في الساحه الشعبيه الان
شاعر له مكانه في قلبك : عبدالمعين الثعلي
شاعر تفتقده : لاافتقد احد
شاعر خدم الشعر : رشيد الزلامي وخلف بن هذال
شاعر له مستقبل : شعراء كثيرين
شاعر تحذره : شعراء كثيرين واحتفظ باسمائهم
شاعر تتهمه : لا اتهم احد
شاعر تقدره : عبدالله بن زويبن الحربي ورشيد الزلامي

س: اقرب القصائد اليك ؟
ج: كل قصيدة لها مناسبه وتوفي بالغرض المنشود ولكن لدي قصيدة نصيحه وهي من القصائد القريبه لي والتي اٌفضلها, ونترككم مع القصيدة:


[poem=font=",5,darkred,bold,normal" bkcolor="transparent" bkimage="" border="none,4," type=0 line=0 align=center use=ex num="0,black""]
أول كلامي نذكر الله ونشكره = ذكر الولي الحاكم المعبود
ومن بعدها مني صلاتً على النبي = عداد ماهبت هبوب النود
ومن بعدها مني نصيحة موجهه = على الولد والمنتصف والعود
أول معانيها على الدين والشرف = ومن لاعتصم بالدين مابه فود
والثانيه وصل اللحم والقرابه = حافظ عليها وابذل المجهود
واعرف حقوق الوالدين وخصهم = وهذي تراها غايت المقصود
بكره ليا فل الكتاب ونشر = تلقابها عند الولي شهود
واعرف حقوق الضيف والجار والخوي = ليا اوفيتها مايلحقك منقود
وعليك بالتوحيد والصدق والنقاء = تطلع بها يم العلا سنود
ترى الردى في الناس ماهو بطيب = والبيض ماتشبه للون السود
اسم الرديه في المسمى رديه = والطيبه ترفع لدرب الجود
وان عارضك في الدرب شخصاً معقد = خله يروح وفارق المعقود
ليا جمعت الماس والكهرب سوا = زاد اللتماسه والحريق يزود
خله يروح النذل مالك وماله= ما أنته على درب الردى محدود
والمعرفه لرجل زينه وتنفع = والصبر زين وبالفرج موعود
وترى الردى ماينذخر بالقبيله = يركض به العدو والمقرود
يقولها عبدالمعين الشاعر = صدرً من الماء يصبحن ورود
والربعه اللي رائيها يفرقها = تنهار لو فيها شيوخ جدود
مثل المريض اللي مصابً بالشلل = ينهض ولاعنده جهد وعضود
والتذكره زينه ومنها فوائد = وتزود المؤمن بذكرً زود
هذا المثل وأنا بوسط عتيبة = تاريخهم طول الزمن موجود
قبيلة في الدار الها معزة = ومثل الجبال الشامخه بحيود
عتيبة الهيلا ليا رد البرا = أهل السطر وأهل الكرم والجود
والجود يوجد في القبائل كلها = ماقول داخل حدنا المحدود
وفي كل ديره حقها من رجالها = وهذا المثل قدامنا مردود
والصدق نور وفيه جزء من الحق = ولا الضلائم فعلها مفقود
واليوم حنا في زمانً طيب = درب الجهل وأهل الخطاء مسدود
الا ضعوفً ماوراها فائده = تاطئ على سبتً بدون زنود
مثل البهيم اللي يساق بحمله = زمائل العدوان واليهود
مسكين في كل الدعاوي محرف = عساه والله ضنوتً ماتعود
سوات حصنيً مصابً بالغلث = يخطي السنع والدرب له مقعود
شرذمةً بكره تجمع كلها = ويشب فيها النار بالعبرود
وحنا بحكم اللي عسى الله يعزهم = حطوا لنا شرع الله المحمود
وليا رحل هذا بداله ثاني = وليا رحل فهد وراه فهود
وحنا عساكرهم على العز والوفاء = والحكم لله ثم لآل سعود
[/poem]




ونترككم أيضاً مع بعض قصائده ومنها هذه التي كان موجهها لشاعر حمود بن مهيان المرشدي ويقول فيها:

[poem=font=",5,darkred,bold,normal" bkcolor="transparent" bkimage="" border="none,4," type=0 line=0 align=center use=ex num="0,black""]
ياحمود يوم انك تعرف الجنوبي = تعرف مراتيعه وتعرف دعوبه
ماشفت بدو بالنزل لو هوبي = وليا سمعت الذكر لديت صوبه
تكفى يابن مَرشد تراهم غدوبي = والقلب من بين الحنايا غدوبه
شغل ولم فوق صاف الجيوبي = ودورلي المجمول واعرف دروبه
تراه له حروه بخشم الهضوبي = الا انهم يم الدهو وجهوبه
وانت فهيم وفاهمً في الدروبي = وماجوه في المقياض ماربعوبه
ومن عقبها النخوه عليك الوجوبي = وقفتك في هذا الطريق محسوبه
دور وثبت وين نزل محبوبي = يمكن عن الدرب السماح احتدوبه
وان كان قابلت الغزال العجوبي = قل وشي اخباره وشو اسلوبه
وليا نشدته خبره عن اسلوبي = قله تراه من الزعل طش ثوبه
قل له ترا صاحبك منك مغلوبي = والغلب والهجران وش هو وجوبه
مغير اوحوحه منه وامزر جنوبي = سواة ذيب راح يمزر جنوبه
يبى العشا والمال عنه محجوبي = وليا اعتدى يبى المراح اعتدوبه
بسهومهم وسلاحهم والكلوبي = ليننهم بالغصب عنه اسندوبه
وسرا وحول فوق عودً عزوبي = والعود قام وبسواري يلوبه
حافه وليا انه مع المسيله يحوبي = ودوب رب البيت فكه ودوبه
والطرد لسرحان ماهو عيوبي = لكن خلي في بانة عيوبه
اخطيت فوقي يالغزال النصوبي = واهل الهوا قدامنا مامشوبه
وقله عن الهجران فيَ يتوبي = قدام ربي ينكبه بالعقوبه
وراه ينساني وياخذ ذنوبي = ماوالله اكبر عند ربي اذنوبه
[/poem]




ومن قصائده كذلك يقول:


[poem=font=",5,darkred,bold,normal" bkcolor="transparent" bkimage="" border="none,4," type=0 line=0 align=center use=ex num="0,black""]
في ناسً عايشه بالحكي والوسوسه = وأن نصيته للوازم سريع الأملاط
دارسين الحكي سوات درس المدرسه = في القفى يشذب وينحاش وقت الاختلاط
وأن بغى يكشت تزين وزين ملبسه = وفي محله ماينومس ولا يسوى البساط
وأن نصيته صك بابه وجود محبسه = وارخوا الاصوات ثم ربضوا مثل الغطاط
لو تطق الباب مافي شخصً يلمسه = جعل يلمس مخ راسه من الجلطه نقاط
جعل بيتً مايجون الرجال بمجلسه = يرجم لين سطحه يجي فوق البلاط
[/poem]



س: مشاركتك فى مجال المحاوره تحدث عنها ؟
ج: مشاركاتي في مجال الشعر كأي شاعر,وبدايتي مع شعر المحاروه كانت مع الشاعر مذكر الحليوي العازمي وسوف اورد لكم هذه الابيات بيني وبينه, يقول:

[poem=font=",5,darkred,bold,normal" bkcolor="transparent" bkimage="" border="none,4," type=0 line=0 align=center use=ex num="0,black""]
أنا خابرك شاعر من قديم ولاعليك قصور = لاكن أن الليالي ماتعلمكم بغايبها
ليا صار أن عندك راس مالً له سنه وشهور = تقضب راس مالك والليالي لاتعاتبها
[/poem]
فقلت:

[poem=font=",5,darkred,bold,normal" bkcolor="transparent" bkimage="" border="none,4," type=0 line=0 align=center use=ex num="0,black""]
أنا ماني ضعيف والمفكر ماقعد في هالسنه مقصور = اخذنا قسم ناسً قدمكم تفتل شواربها
اخذت البنت ليله ثم اباخذ من بنات الحور = ماهو باللي مقابلها بعد شابت يقالبها
[/poem]



وكذلك محاورتي مع الشاعر معيض الموسمي المطيري ويقول:

[poem=font=",5,darkred,bold,normal" bkcolor="transparent" bkimage="" border="none,4," type=0 line=0 align=center use=ex num="0,black""]
اكلتوا حلال الناس واويلكم ويلاه = بعد بان رحتوا عن محله تدسونه
[/poem]


فقلت:

[poem=font=",5,darkred,bold,normal" bkcolor="transparent" bkimage="" border="none,4," type=0 line=0 align=center use=ex num="0,black""]
الا يامعيض انت مكلفت محل أشواه = أشواة ماهي بتبين في الجمر مدفونه
[/poem]



وأيضاء كانت لي محاورة مع الشاعر حبيب العازمي حيث قال:

[poem=font=",5,darkred,bold,normal" bkcolor="transparent" bkimage="" border="none,4," type=0 line=0 align=center use=ex num="0,black""]
سلام ياراشد سلامً كل ماغلق يعاد = والرجل مايرضيه غير إللي من اول كان اله
في مامضى ماعندك الا مايثور من الزناد = واليوم ذيب قصير والشفان جاء ذيبً كله
[/poem]

فقلت:

[poem=font=",5,darkred,bold,normal" bkcolor="transparent" bkimage="" border="none,4," type=0 line=0 align=center use=ex num="0,black""]
يامرحبا ترحيبةً فيها الدغامه والعناد = والاسم هذا مايحول لو يريد يحوله
والليله ابي اللبسه عباه وثيابً جداد = حتى ليا منه سرا يدخل بها غرفة هله
[/poem]


ومن محاوراتي أيضاً مع الشاعر فيحان القعياني وفيها يقول:

[poem=font=",5,darkred,bold,normal" bkcolor="transparent" bkimage="" border="none,4," type=0 line=0 align=center use=ex num="0,black""]
ياراشد الليله مهدد عندنا مثل الاسير = نبا نطشك في البحور تشاف ولا ماتشاف
والامر لله والاوامر ناصيتك من الامير = وأنت تشدد في طريقك لاتذل ولاتهاب
[/poem]
فقلت:

[poem=font=",5,darkred,bold,normal" bkcolor="transparent" bkimage="" border="none,4," type=0 line=0 align=center use=ex num="0,black""]
ترا اللغم عند اللوازم يفجر الضلع العسير = وأنت عبنك حالمً لك حلم وبحورك جفاف
يامادح نفسك بلا مداح علمك مايصير = حافظ على شيمتك لاتلطم ويعميك العراف
[/poem]








وهذه قصيدة من أخر قصائده ونترككم معها ويقول فيها:


[poem=font=",5,darkred,bold,normal" bkcolor="transparent" bkimage="" border="none,4," type=0 line=0 align=center use=ex num="0,black""]
ما والله أزين شبت النار في البر = عقب السويبع في حساب الليالي
اقبالت الوسمي على نهاية الحر = والعشب في العبله تقول الزوالي
والكيف مجذيً من الحلو والمر = والي عليها من زحول الرجالي
هذي مجذيه وهذي تبهر = وجت السوالف والعلوم الجزالي
يفرحبها الطرقي لاجا ويستر = يلقى الشحم ومبهرات الدلالي
وعلمً ينومس لنشاما ليا مر = لازانت الجلسه وجاله مجالي
يبعدك عن مجلس هل الحقد والشر = اللي على الفتنه يجيهم وكالي
ناس تولى فوقها ابليس الاعور = و مصيبهم تالي الليالي اهبالي
وليا نصحته جاك بالعلم الاكبر = وابغضك لو انه رفيقً موالي
ليا نصحته جاك بالعلم الاقشر = ثم قال جنب حيد مالك ومالي
انت غبي والوقت داير ومفتر = وانا زبون الحرد حام التوالي
وفزع وزرهفله بناسً مغرر = واستاقهم سوق الفحل للمتالي
يقول عندي مال فيها اتفاخر = وباخذ العالم بخشم الريالي
ولايتبعه ياكود ناس مثبر = الي عليها نقص في كل حالي
وأحدث وسواله مشاكل وغثبر = وشب الفتن بين الولد والخوالي
وعن هالنمونه ودي انحاش واظهر = لو اني اجلسلي بواديً لحالي
[/poem]








س: وأخيراً ماذا تقول لشبكة القبيلة؟ وبماذا توجه لها؟
ج: أولً اشكركم على هذا اللقاء الطيب وأنه من اجمل اللحظات واسعدها أنكم في محلي وتحملكم لي, واشكر جميع من قام على هذه الشبكة وعلى ماتقومون به من جهد جبار لخدمة القبيلة وموروثها الشعبي وابراز شعرائها وتاريخها المشرف أمام الزوار والاعضاء والشكر موصول كذلك لجميع اعضاء المنتدى والقائمين عليه والمجهود الطيب والملموس منهم وهذا واجب على أبناء القبيلة, واوجه لشبكة القبيلة بحفظ تاريخ القبيلة وتواصل أبنائها وجمعهم على الخير والمحبه ونتمنى أخذ للقاءات اكثر مع شعراء القبيلة لان يوجد شعراء من القبيلة شعرهم فيه الجزاله ولكنهم بعيدين عن الاعلام والاهتمام اكثر بهم.واخيراً بيض الله وجيهكم والله يعطيكم العافيه وليس بغريب عليكم الاهتمام بالقبيلة وعاداتها الحميده..














آخر تعديل بواسطة مخلد بن ماشع ، 02-14-2011 الساعة 12:06 AM
مخلد بن ماشع غير متواجد حالياً   رد مع اقتباس
قديم 02-14-2011, 02:13 AM   #2
معلومات العضو
وجودك يكفي

عضو الإدارة

ولد ثابت

الصورة الرمزية وجودك يكفي
رقم العضوية : 19038
تاريخ التسجيل: Nov 2009
مجموع المشاركات : 13,683
قوة التقييم : 10
وجودك يكفي has a reputation beyond reputeوجودك يكفي has a reputation beyond reputeوجودك يكفي has a reputation beyond reputeوجودك يكفي has a reputation beyond reputeوجودك يكفي has a reputation beyond reputeوجودك يكفي has a reputation beyond reputeوجودك يكفي has a reputation beyond reputeوجودك يكفي has a reputation beyond reputeوجودك يكفي has a reputation beyond reputeوجودك يكفي has a reputation beyond reputeوجودك يكفي has a reputation beyond repute

بيض الله وجهك ولآهنت على النقل

وجودك يكفي غير متواجد حالياً   رد مع اقتباس
قديم 02-14-2011, 09:09 AM   #3
معلومات العضو
النجم الأصيل

الإعلامي زاحم العتيبي

الصورة الرمزية النجم الأصيل
رقم العضوية : 16720
تاريخ التسجيل: Mar 2009
مجموع المشاركات : 2,225
قوة التقييم : 20
النجم الأصيل is on a distinguished road

شاعر معررووف بكل المقاييس بالتوفيق له


لا هنت ابن ماشع

كل التحايا لك

التوقيع : النجم الأصيل
تابعوني على تويتر
زاحم العتيبي
النجم الأصيل غير متواجد حالياً   رد مع اقتباس
قديم 02-25-2011, 10:14 AM   #4
معلومات العضو
ابوبدرالسراح
عضو جديد

الصورة الرمزية ابوبدرالسراح
رقم العضوية : 22457
تاريخ التسجيل: Jan 2011
مجموع المشاركات : 32
قوة التقييم : 0
ابوبدرالسراح will become famous soon enough

الله يبيض وجهك يابن ماشع
راشد مسعد شاعر ومعروف
جهود جبارة وعلى القوة انشالله
كل الاحترام لك

ابوبدرالسراح غير متواجد حالياً   رد مع اقتباس
قديم 06-10-2012, 10:44 AM   #5
معلومات العضو
برمجي فنان
عضو جديد

رقم العضوية : 24373
تاريخ التسجيل: May 2012
مجموع المشاركات : 41
قوة التقييم : 0
برمجي فنان is on a distinguished road

مشكور يا اخي على البرنامج الرائع وللامام دلئما

برمجي فنان غير متواجد حالياً   رد مع اقتباس
إضافة رد

العلامات المرجعية

أدوات الموضوع
انواع عرض الموضوع تقييم هذا الموضوع
تقييم هذا الموضوع:

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع




Powered by vBulletin® Version 3.8.7
Copyright ©2000 - 2024, Jelsoft Enterprises Ltd.
جميع المواضيع والتعليقات على الأخبار والردود المطروحة لا تعبّر عن رأي ( منتديات قبيلة عتيبه ) بل تعبّر عن رأي كاتبها