بعض المجالس

[راعي الوفاء]

المجلس الي مايقدرك راعيه
خلك عزيز النفس مالك وماله
لاصار ماحطت لجنبك مراكيه
تلقى من خيار المجالس بداله
مغنيك ربك عن قهوته وشاهيه
دام المعزب مايسرك قباله
دور على مجلس اليا جيت ناصيه
حصلت خمسه من شروط الرجاله
تقدير في قلبه وترحيب يبديه
وعقل وادب ومبهراتن دلاله
مجلس رجال العرف كل الفخر فيه
عنه الرخوم يقدمون استقاله
بعض المجالس محكم العقل توذيه
يلقى بها شخصن كثير جداله
يفضح لسانه مايكنَه بخافيه
زودن على جهله سريع انفعاله
في رايه إن العلم عنده وحاويه
لو كان غارق في محيط الجهالة
وفي رايه ان الناس لازم تباريه
ولو فيه فرصة كان كبه ظلاله
شخصن بليا دين لاتعتزي فيه
واسمع كلام مجرب الوقت قاله
كتاب حالات الرياجيل قاريه
وحصل به اكثر من ثلاثين حاله
وصور بعضها ماتطرق لباقيه
ولو يشرح الحالات طول مجاله
الشاعر:فهد هجاج البشري