(( ديوان الألغـاز ))

[{ أبوفيصل }]

وش بناتٍٍ للعوارف متعبات
بينهن وصل وقطاعه يالطيف

أشغلني بالتفرق والشتات
لولا وصلٍٍ بينهن صعب وكليف

ساكناتٍٍ في غرف متساويات
وسط بيتٍٍ ما لضيفانه مضيف

وأتعبن فكري وهن إمسلِّيات
اقصد الترفيه والمعنى شريف

[{ أبوفيصل }]

انشدكم عن (ثلاثةٍ) متشابهين
يفرق بعضهم بنتٍٍ زادتهم حلاه

اللي يجي موقعها من فوقه يبين
واللي يجي مسكانها داخل حشاه

أشكال روسهم مثل اللي خايفين
طمعة سلوقيٍٍّ على شوفة عشاه

[{ أبوفيصل }]

ياويش بنتٍٍ ماضي الوقت القديم
وعلومها عند الغوانم غانمه

فيها مثل معروف عنها فالصميم
والعلم بيِّن للعرب ...معالمه

ماحصَّله غانم يحصّل له غنيم
يوم المصادر ماتجي بمكالمه

[{ أبوفيصل }]

أنشدك عن رجال جاب أجنبيه
وادخل علينا داه خبث ومغثه

يبغى يغير .. نهجنا.. عنجهيه
ويبغى عزاز النفس بثياب رثه

غريب دار وداب في جلد حيه
وهي على عكس الفضيله تحثه

[{ أبوفيصل }]

ياويش حيٍّ يعجب الناس بإسمه
لو كان ما هو قد لإسمه وطاريه

إليا عكست إسمه هذا صغر جسمه
يا شين حظ اللي قرا عند أذانيه

[{ أبوفيصل }]

ويش رجلٍٍ معترض عرض الطريق
مرَّ به رجال... حاكم ... معتبر

يوم جاء للتصفيه صفَّى فريق
طلَّع اللي.. مايِشَدّ ابه.. الظهر

ويَبْست الأرياق يا يابس الريق
والمهابه.. تِخلِف إقلوب البشر

[{ أبوفيصل }]

يا ويش بنتٍٍ زوجوها بشايب
ماتفرقه دايم في جنبه قريبه

لو فارِق العمر ما يرد القرايب
مزيونةٍٍ في عين أهلها عجيبه

مازوجوها جبر والا غصايب
لاكن لو يدخل عليها مصيبه

[{ أبوفيصل }]

ياويش بنتٍٍ ما تثمَّن بالأثمان
ان جات تسكن ماتحرك شفايفك

ما مثلها بالكون كله والأزمان
من خفها ترفع خفايا خفايفك

[{ أبوفيصل }]

يا هِوات .. اللغز .. للغز وزنَه
ان كان للميزان والوزن وازن

العاشقين إثنين مازن ومزنه
واحلا علاقه بين مزنه ومازن

كلاًً على مخزون فكره وخزنه
إمكملين ال بعضهم بالتوازن

[{ أبوفيصل }]

ياويش بنتٍٍ ناقصٍٍ جسمها شي
لو ما به أحدٍٍ ماخذٍٍ من جسدها

الأم هي بالإسم تنسب لها.. هِي
لليوم تِنسب بإسمها هي وحدها