أنا عتيبي عريب الجدّ من برقا

[الصهد]

عز ّ الله إني حزين ٍ عقب جيراني
............. الله يجازيك يامن سبب الفرقا

ياللي بديت الطويلة وأنت طرباني
...................... بالله حوّل وخل ّ المشتحن يرقا

كوده يطالع وراها متعب الباني
..................... ويشوف قطعة نباتي وسطها زرقا

أحب هاك الوطن من بد ّ الأوطاني
.................... عسى روابيه من زود المطر غرقا

ديرة هل الجود والمعروف سبعاني
................... ياعنك ْ ماهم بـ ناس البوق والدرقا

الطيب ورث ٍ لهم من ماضْ الأزماني
........................ ماجاهم الطيب لا بدعة ولا سرقا

نحـيّتني عن نحاهم يانحيّاني
............... مالي جدى الاّ أشتكي وأجاوب الورقا

أمر ِ علينا مقدّر كاين ٍ كاني
..................... غرّبت واللي يبيهم خافقي شرقا

مدري وش اللي مع الأجناب عنّاني
..................... وأنا عتيبي عريب الجدّ من برقا

عبدالله ابن خويتم العصيمي
رحمه الله