جيتك وكني مالك تاج كسرى

[دمـــعة غـــريق]

السلام عليكم

يقولون من طول الغيبات جاب الغنايم وانا جبت لكم قصيده لشاعر ماشالله عليه ارسل لي الابيات هذي باحد المنتديات .. وحبيت انكم تشوفونها ...

الشاعر اسمه الشقاوي. بس على ماظن انه مهو عتيبي<< ماشاء الله عليه.

.......

جيتك وكني مالك تاج كسرى‌‌ ‌‌‌‌‌‌‌‌‌‌‌‌‌‌# من فرحـه عيونـي بشوفتـك يازيـن
جيتك ومن عقب البطا قلت بشرى # بمقابلك تشفى جـروح المحازيـن
جيتك بحب في ضميري مقرى # ساسه قصر قيصر وخلاياه من طيـن
جيتك ظمان ونظرتي فيك كبرى # نيمح لخيال الشعر ... يـارد العيـن
جيتك اسوق خطاي والليل قمرا # جيتك اسوق مـن البشايـر ملاييـن
جيتك اقول انك على القلب تطرا # ولا دريت انك بها الشـي تدريـن
قمت تتكبر قايد الريم شقـرا # وتقـول ودعنـا مـن النـاس غاليـن
مدري غيور وخاطرك بي مسرى # من فرحتك قمتـي علـي تتغليـن
ولا تعلمتي الدلع وجره الرا # واصبحت تلهب خاطـري بيـن ناريـن
مدري من الي غيرك وأنت ادرى # اني بحبك في سجل ... المجانيـن
اليوم مجرى وأمس يا زين مجرى # ولا عصا موسى بملـك المحبيـن
ودعتني ثم قلت ارجوك برا # جاملت ومـن جامـل يـذوق الامريـن
صبرت وقلت يخالف العسر يسرا # طال الصبر وخالف العسر عسرين
ساهر مع نجم السهر واتحرى # جسر الوفا ما قـال يمكـن تخونيـن
واليوم جيتي وقلت للحب أسرى # أغفر لذنبي وأنـت ذنـب المذنبيـن
يا لعنبوك اشلون قلبـك تجـرا # تحفـر لقبـر فيـه دم ... وسكيـن
مسكين من نظرته في الحب صغرى # مهما فعل خاتمته يقال مسكيـن
يا بنت قلبي من حياتك تبرى # ولا عاش في هيكـل انسـان روحيـن
لو كنت ذنبي وقلتي ربي يغفرا # لا والذي لامـوت مـا قلـت أميـن
بسابع سما قلبي رفعته وجهرا # لوكان سلم فرعـون بايـدك تعجزيـن
واصبر صبر ايوب لازم تخسرا # لك يوم يا الناسي وللنـاس يوميـن
هذا جزا اللي مال راسه لعذرى # وهذى جزاه الي تخـون المحبيـن
مهما يطول الجرح لابد يبـرى # لاشـك تبقـى لـه أثـار وعناويـن
دور بديلي واترك الجرح ذكرى # وأنا بعد بقصد مـن النـاس ثانيـن
وأقي كلامي في عيوني بشعرا # وأقري حروفي ليش عنهـا تصديـن
جبريل كلم النبي وقال اقـرا # وجبريـل حبـي قـال لابـد تقريـن
وأنا بدوي وان كان قلبي تحضرا # فما هو بمعنى ذلك انـك تغدريـن
بيت الشعر بيتي وعايش بصحرا # وارعى الغنم وأحب شوف المزايين
واللي غدربي ساحه الحب قشرى # ماني بسامح لك علي ...اتماديـن
والثار للي بالكلام يتخطـرا # عاداتـي أكبـر مـن جميـع القوانيـن
أنا بدوي حذراك يا بنت حذرا # طبع البدو أكبـر مـن انـك تناسيـن
ازريت لكن لا تزر وزره أخرى # بترد وحن عاداتنـا نقضـي الديـن
جيتك وكني مالك تاج كسرى # وأقفيت وكنـي قاسـم التـاج نصفيـن

وهذا ردي للاخ الشقاوي

,,,,,,,,,,,,,,


حي الكتاب اللي نــظـم لي بـسـطرا ** حيه من اقصا نجد لدرا ربعنا الادنين

يوم جيتني يامرحبا لك قلتها شكرا ** يامـرحبا لفــيتـنا ولبيـيت لنا داعــين

ويامـرحبا لك بقولها اليووماً وبكرا ** وبعيدها بمدمعي ليا شـفتكم مقفـين

حي الشقاوي بمنزلٍ له عندنا يطرا ** وعقب البطا راعـيه يظـهر لنا بتقنـين

كان العتب على الغلا من خطكم يقرا ** كـثر العتب في هالغلا بخفوقنا شين

نظمت لي شـفقك ونظمت لك عـذرا ** وقبلتني بعـذري ورجعت لي بتثمـين

قلت العذر وهو يشعل بداخلي جمرا ** تكفى اتركه هالقلب لاتجرح المدمين

سـم العـذر يجـري بمـجمـعي مجـرا ** مجـرا سـيول طـويق محدره بـصــفين

صـفٍ يجـر الـدم ومعـه العـنا يجـرا ** وصـفٍ يخـنق النفـس وبمـوتها يحـيين

لاتجـبر الخــاطــر لا بـكــنته يــذرا ** خل الخفـوق مصبر حافظ وجعه سـنين

رعــيت انا همـي بوحـدتـي دهــرا ** مرعى خيال النود يرجي الوطا بالعين

وذكرت لك عذري يوم العـذر ســرا ** قـلب الهوى منجـم ولابمـكنزه معطين

مابي وليف ارجـيه ولابي غلا عـذرا ** عـذراً ترود المـوت ومنه الحـذر توصين

كـلٍ ذكـر وده واذكــر انا النـكـرا ** انكـر غلى رجـالاً بشـين الهدف واطـين

لاتلومـني ياللي طــلبتني بسـترا ** رفضت انا قـربك يووم عرفـكم مـخفـين

ولك الغــلا عندي ابمـنـبته زهــرا ** غـلاً صـفاء بالشــرع مانرفـضه بالــدين

غلا الهنوف اللي تكيد العدا بنصرا *** في قلبها النخـوه بنت الحرا شاهين

تعطيك تاج العز يومك تطلب القمرا ** مـن ياصـل القمــرا وبتاجـها مــاسـين

ماغير تاج العذر يجبر تاجكم جبرا ** وتاج عزنا يسوى(تاج كسرى)بتاجين

,,,,,,,,

[دمـــعة غـــريق]

...هذا رد للاخ مقرن المطيري.. موجه لي طبعاً لان ردي للاخ الشقاوي كان بأسم غير معروف.

........
ياللي بشعرك نور في كل غدرا........وياللي على علوم الغلا منك مبطين

بقدم التاج وهل يكفي التاج مهرا......وماظنتي يختلف في راينا اثنين

ودي اعرفك واستميحك ياهيه عذرا........من انتي ياللي بالقصايد تنادين؟

النار نار ودايم دروب الهجر هجرا........ماهجرنا هاجرً يشتكي هجر مغلين

نزرع سنابل حبكم في ارضنا ونذرى....ونغرس غلا في ارض ناس عزيزين

ونكتب شقى ونرسم على الخد عبرى......لاصار اقفيتو عن الوجه والعين

يابنت انا ماني على اسمك مورى...........ولاني بطلاب الهوى فبحر عشرين

ولاني على كيف الهوى ولاني مضرى.....ولاني بعيد ولاني من اقرب قريبين

ذقت الهوى وعانيت من دنيتي المرا.....واصبحت فالدنيا كما قاب قوسين

هذا الهوى في جملته كراُ وفرا........في اول العمر تذكر وفي اخره تنسين

اقبلت لك وانا احسب الوقت فجرا........ورجعت من بابك مدري؟ بين الصلاتين


__________________


وهذا ردي عليه

,,,,,,,

حي الجـواب اللي وجـه لي بقـدرا..... حيـه من واحــداً بعـرفه قــديمـين

ليا خـانك القـلب وجهـلتني بشـعرا.... اعــرف جـفا ردي لنـاسـاً تعـادين

ماغـرني باللسـان قول الولـه غرا......حفظت انا قلبي لمن بالغلا يعطين

غـلا الهـنوف اللـي اعـيدها بــكّرا..... واقـولها للي على عرفه حـريصين

غـلا الاخـو ياللي بك الصـله فخـرا.....عزك وسـاسك ادري ناساً كريمين

ياناشـدن عني هـو بالخفى سـرا.... ولو الخـفى يبطي بيظهر بعد حـين

انا الرمـووش اللي بشـوفها نسرا..... جرح العنا عندي لقووماً مسـاجين

ياجــاهلاً عــرفي وبداخـلك تـدرا......تنشد عن المكني وبمنشدك تعنين

ان دار الزمن والا صار العمر شهرا.....راع العـنا ياضح وراع الصـفا ايـبـيين

وبنـبهـك ياللـي ظلمـتـني بنـشـرا..... مـاذكـر انا ضـيفاً يـزورنـا بـوقـتيـن

برد لك النشده وبمـنـطـقي بـتـزرا..... جـهلتـني وقــبلك ناساً كـثـيـرين

دمعة غريق اللي تظهر لك بسترا....ودام ظهرت اصمت وابردها لاتهـين

,,,,,,,,,,
اتمنا المساجله تعجبكم

[@ عتيـبـي نجــد @]

[ALIGN=CENTER][TABLE=width:70%;background-color:transparent;background-image:url();border:1 groove indigo;][CELL=filter:;][ALIGN=center]
دمعة غريق
اولاً : نقدر لك مشاركاتك بفاعاليه في المنتدى
وتوهجك ويجبني طموحك الذي لم ينكسر رغم
آراء بعض الاخوان المحبين لك من اعضاء المنتدى ..
ثانياً : صح لسانك ولسان الشقاوي والمطيري
بالنسبه للقصيده الاولى : يشدني لها مطلعا القوي
وجمال حروفا , وهي بشكل عام رائعه
ولكن لدي تحفظ عند بيت واحد من القصيده ..
وصح لسانك على الرد الاولى ..
ومن وجهت نظري ان ردك الاخير احلى من الاول
واجمل .. ربما لعتقاعدي بل جزمي انك في كل يوم
بل كل قصيده جديده تكونياً اقوى .. والى الامام
وساكون من متابعيك ..

و اما عن القافيه فلا ادري لماذا
فووووتوا ذكر المصريه كيلو بترا :)

ومره ثانيه شكراً لمشااااااركاتك وتفاعلك معنا ....
ولك ازكى تحيه ..[/ALIGN][/CELL][/TABLE][/ALIGN]

[دمـــعة غـــريق]

هلا والله اخ عتبيبي نجد


اسفه على تأخري بالرد

وصح بدنك .... اشكرك على الاهتمام بالموضوع .

واتشرف ان يكون لي احد مثل شخصك من متتبعينني بالقسم .

تســــــــلم يالغالي .

اختك

,,,,,,,,,,,,,,,,,دمـــــــــــــعة غـــــــــــريق,,,,,,,,,,,,,,,,,,