منتديات عتيبه - أبي حبّـك , وأبـي قربـك , وأبـي ( لبّيـه ) يالبّـاك

غريبه يامعاندنـي , تجـي واتقـول جـاك امـنـاك
تجـي يوميـن ثـم تبعـد , وقصـدك بـس تذبحنـي

غريبـه كـل هالعالـم , تلفّـه لــف فــي يمـنـاك
ولا لك بيـن كـل النـاس , غيـري وانـت خابرنـي

تعوّذ من بليـس وهـاك , دام القلـب , راضـي هـاك
( حبيب ) القلب واسكن ( نبضه ) , واحتـل واشربنـي

أنـا والله لـولا الله , وخوفـه قلـت لجـل ارضــاك
وحبّـك جيـت فـي الدنيـا , ومِـنـك الله خالقـنـي

أنا يجتاحني رجفه , لو اسمـع بـس , وقـع اخطـاك
اجل وش عاد لـو شفتـك ؟؟ , حشـا , والله تموتنـي

أنا لو سلهمت عينك , بعينـي , قلـت لـك ( نفـداك )
أنـا داخــل بـوجـه الله , ووجـهـك لا تضيّعـنـي

انا من وين ماوجهـت وجهـي , فـي الوجيـه ألقـاك
أحـس انـك تبعثرنـي , ولا ادري كيـف تجمعـنـي

أجي لك شرق يسرقنـي , جنوبـك , وانسحـب منّـاك
وأجي لك غرب يسرقنـي , غروبـك وانـت تشرقنـي

انّـك معـي دايـم , واتـوه بعالمـك واحيـاك ]
وافوق احيان واتسائـل , لـك الله كيـف سخّرنـي ؟؟

تفاخر ( لعنبوا غيرك ) , ترى غيـرك , يمـوت اهنـاك
وربـي ينتظـر كلمـه , وأصــد وهــو يكلمـنـي

ومادام الله عطا لـك شـي , فاشكـر واغتنـم ماجـاك
ومـادام اتشوفنـي ساكـن , نصيـحـه لاتحرّكـنـي

أنا لو قلت لك بانسـى , ورب البيـت , صـدق انسـاك
لذا : , لـو شفتنـي بانسـى , فانـا طالبـك تمنعنـي

واذا قـررت تمنعنـي , وشفـت ان القـرار أعـيـاك
مـا بيـك اتقـول وش تبغـى , تـرى والله تضايقنـي

انا أبغى ؟؟ , قول وش ما ابغى !!, على بعضك كذا أبغاك
ولعيـونـك , باخرّبـهـا , واذا مجـنـون قـيّـدنـي

أبيه ايصير فـي عينـي , منامـك والرمـوش اغطـاك
وأبيه ايصير فـي عينـك , منامـي وانـت تسهرنـي

أبي حبّـك , وأبـي قربـك , وأبـي ( لبّيـه ) يالبّـاك
أبي ضمّك , وأبي شمّك , وأبـي لـو طلـت تجرحنـي

أبيـك ان قالـوا الشاعـر , تقـوم اتـفـز دون ادراك
أبيك اتحس بـي دايـم , أنـا اقصـد وانـت تسمعنـي ,

وقـل مجنـون لا يسمـع , ولا يفقـه , وانـا اتحـدّاك
ايلا منّي نويت انسـى , باشـوف اشلـون تمنعنـي !!