..جرح غزه ..
 

000الصارم نايف بن عرويل000
جرح ٍ تمركز بوسـط الجـاش وابتـزه
واضهر فرايـد لهـا عاميـن مكنـوزه
ماتت وجيـه الرجـال وماتـت العـزة
واجتاحنا الـذل واعلـن للمـلا فـوزه
يا اهل المناصب وش اللي صار في غزه
يا وجيه ذل ٍ على الشاشـات مـرزوزه
شـي ٍ يوقـع بوسـط القلـب ويحـزه
مشاعر الناس مـن ماصـار مهـزوزه
قنابـل ٍمـن سماهـم مالـهـا حــزه
ماجت على اهـداف معنيـه ومفـروزة
يقتلبهـا اللـي بمهـده وامـه تهـزه
ويقتلبها اللي عـدل ممشـاه عاكـوزه
جمـع الجنايـز مثـل تجميعـة الجـزه
على بعضهـا جثـث النـاس مكـزوزه
رمح اليهودي بوسـط صدورنـا غـزه
وحنا عجزنا نشيـل الرمـح ونهـوزه
اجيوشنـا فـي قبـال الضـد منهـزه
وفينا الخطايا لضلـم الوقـت معنـوزة
ياواهـي العـذر عمـر العـذر مانـزه
خرايـط الـذل قـدم العيـن مقـزوزه
من حرك الجيـش قـل بالله مـن دزه
من سكت الشعب قلي واحكـم قـزوزه
بالله منهـو يـوز النـاس مــن وزه
عسى الغنايم عقـب ماصـار محيـوزه
دور السفارات وسط العرب مـن عـزه
خـلا للأوغـاد وسـط ديارنـا حـوزه
مافيـه داعـي نفضـح فيـه ونـلـزه
بعـض العبـارات فالأعـلام محجـوزه
ماتت وجيـه الرجـال وماتـت العـزه
ياوجيه ذل ٍ على الشاشـات مـرزوزه

...الرابط الصوتي...
[url]http://www.saarm.com/saarm/gazh.rm[/url]