منتديات عتيبه - يابـو خـدودٍ تشابـه خـدة فلونـه

[poem=font="Simplified Arabic,6,black,bold,normal" bkcolor="transparent" bkimage="backgrounds/27.gif" border="none,4,gray" type=2 line=0 align=center use=ex num="0,black"]
ياراعي الموتر اللـي بايـحٍ لونـه=
اللي من الشمس راحت معظم الوانه
مكروف لين انتهت جلدة دركسونـه=
واربع سكاريب تلـزم روس بيبانـه
من مصنعه ماتغيّر زيـت سيفونـه=
صوت السبايك على الجنبين حنانـه
ولابه انبير يمشـي وسـط طبلونـه=
سيورهن من قديم الوقـت خربانـه
والقيـر لاعشّقـوه اثنيـن ينسونـه=
مايعتقه لين يظهـر زيـت شكمانـه
والمرتبه في بطون الضان مدفونـه=
وجنوبها من ثقيـل الحمـل هريانـه
ورفارفه جنب طنب البيت مركونـه=
طاحت مساميرهـا والحـال تعبانـه
ماترحم اللي معك يمشي على هونـه=
مطفّـي النـور والرجليـن حفيانـه
يسوق عمره علـى دربٍ تسوقونـه=
قلبه تحطم وهـذا صـوت رمانـه
يابـو خـدودٍ تشابـه خـدة فلونـه=
ماهيب من رشـة المكيـاج مليانـه
وبريقـعٍ صغّـروه اللـي يسوونـه=
مـرٍ يغطـي ومـرٍ ذيـك لحيانـه
والجسم شيٍ يـدوّخ مـن يشوفونـه=
بنت من مقابـل الخلفـات فسقانـه
ماهيب في دجة الموضـات مفتونـه=
اللي مع السـوق رجليّـه وهجانـه
الوجه مكشوف والخديـن مدهونـه=
ولاتخلّـي ولارجّـال فـي شـانـه
يابنت شرع السواقه ويـش قانونـه=
يوم القوانيـن عنـدك مالهـا خانـه
قالت مع البـر مملوحـه ومزيونـه=
جوٍ يغطّي علـى الـزلات ميدانـه
وسواقةٍ فالمدينـه غيـر مضمونـه=
لاشافوا البنـت كـل طلّـع لسانـه
في زحمة الناس كلٍ يفـرك عيونـه=
تقول جمهـور فـنٍ شـاف فنانـه
سواقتي من ورا الابرق ومن دونـه=
من خلف نوقات ابوي وخلف غنمانه
الشايب وحْيد والرجليـن مرهونـه=
ولابه اخـوٍ يقـوم بـلازم اخوانـه
مانيب اعَرف البحر يللي تعرفونـه=
ولاتمشيـت تالـي الليـل سهرانـه
ولابي الناعم اللي يسحـب ردونـه=
اللي على طول يومـه ياكـل لبانـه
شفي مـن البـدو رجّـالٍ بكرتونـه=
معَـرَّبٍ راس ابـوه وراس جدانـه
يصلّي الفـرض لاقامـوا يصلّونـه=
ويصوم شهر رمضان ويحفظ اركانه
ماهوب لاجا الضحى دنّق على التونه=
ولاقالـوا الله اكبـر شـب دخانـه
قلت اشهد انـك سنافيـه ودندونـه=
والعقل نعمه من المعبـود سبحانـه
والسالفـه حدهـا ذربـه وموزونـه=
يطرب لها المستمـع ويقـول فنانـه [/poem]الشاعر : سعيد الاكلبي