|
بنتن لها ياشايق أختن شقيقه
في موقف الأحزان ما رافقتها ونهاية الميقاف.. هاذي حقيقه لدَّت لها الأنظار.. ما خالفتها |
بنشـد الشعـار وأنـشـد مستـشـار الملتـقـا
وأنشد الحضّار وابنشد هَـلَ الفكـر النقـي كلمتينٍ واضحـاتٍ جـن علـى وضـح النقـا جن على وضح النهار اِجهار من رجلٍ تقي واضحاتٍ ساميـاتٍ مـن بعـد صبـر وشقـا بيّحن سـد الخصيـم وبيّحـن سـد الشقـي |
يا ويش بنتٍ ، يسترد إبْها قِواه
رجلٍ لقاها فرصةٍ له ، وإستراح معروفةٍ بإسمه وهوماحد غواه يقضي دوام مْهمِّته بذل وكفاح هذي من الامثال واقوال الرواه والاكيد ،،، إن لغزنا ،، تم بنجاح |
أنشدك عـن رجّـال لاقيـل رجّـال
رجـلٍ لقيتـه مـع يهـودي وبـوذي في ذمة المسلم ترى ذبحه حلال لاصار يوذي غير ماهـوب مـوذي يِكْـرم ولكـن ياكريميـن الأفـعـال أحيان يهان ومنه يوخذ أخـوذي |
ويش بنتٍ تحسم الوضع المحيّر
اسمها من منطلق حسم القضيه جات تقضي أمر مافيـه امتخيّـر تنهي الموضوع في وقت الأسيّه قيـل ماعنـهـا مصـاديـد وتـذيّـر من تجي لـه ماتحـرّك لـو شويّـه |
يا ويش رجلن فيه ياربعـنـا زود
رجـلٍ تمـيّـز عــن بقـيّـة خـوانـه يلفي لنا في وقت محدود ويعود في كل يوم يعـود تعـرف زمانـه |
انشدك عن رجلين ماهم قراين
لكن يسدون الطلب وقت مامول بإتمام عام... يتم ويصير باين والثاني عمره نص الأول ومقبول |
( خمسة أحرف )... كلمةٍ تعنيبها
كلّ شخص.. يخالف النهج الصحيح وحرف مع حرفين.. كيف أجيبها وكلمتي من خمس بالمعنى الصريح . |
ويش عودن باركن مبرك جمل
ان خبطته في جنوبه، مايلين من هديره لا هدر .. لا يُحتمل والعيال إثنين فالجنب المتين كل منهم .. دون الاخر ما كمل ذا .. يفر وذا .. يتله مرتين شغلهم .. نفس المهمه والعمل بإختلاف أشكالهم.. متعاونين |
ويش رجلن له صبي ن جلّسوه
في حضين ابوه مايجلس وراه ميّزوه بشكل ابوه ... وصغروه وعدلوا له جلسته واصبح فتاه |
من ندَّر الأفكار .... لغزن بالأشعار
أهديه.. واهل الدار تعرف معانيه قال المثل.. ياسادة العرف والشار إنَّ من الحب .. ما قتل روح راعيه لكنّ به حب ن ... يعرضك الأخطار لابارك الله فيه ... وْلا في سواعيه اليا قلبته .... تاجده حول الاسوار الحد بحدود الولي .... ما يراعيه |
مبدا السؤال اللي يشابه جوابه
لغزن خفا خافيه خلف الكواليس اللي ليا بغيته ،،، أكثر ،،، رتابه شلت أوْسط حروفه خلاف المراويس يبعد عن الوجه الكئيب ، الكآبه لولاه ضاقت به عيون المتاعيس |
ياويش رجلن من عيونه تهرج
ماينطق الكلمه ،،، وكلن يغوله اليا عكست اسمه تعال وتفرَّج تلقاه صوب اللي تقارع طبوله |
ويش الذي لونه كما لون غرنوق
سهلٍ ... ليا روَّح من الفك للفك لاشلت راسه يشلع بصاحبه فوق وأتلاه لامن شيل شرد الضبا فك |
ويش الذي من غير.. باب وشبابيك
بيتن على مبناه .. محدن سكن فيه طقيت انا جدره وإلى هو سيراميك والكل يبغى يشوف ويش الذي فيه |
الله على الِّي رفّ لي حاجبه رف
سمح المحيا .. لا بدالك محيَّاه بتقايته ماشوف غير أربع أحرف أربع حروفن يشبه الثاني أتلاه وليا انتصف عمره تبيَّن وشرَّف أقبل بوجهن.. لايقن به مسماه |
ويش بنتن.. زهْرًها يقطر نداه
في حشاها .. كنه اللُّول النثير من شذاها رايح المزن وشذاه لاكساها ... زاهي اللون المثير منتهى عوْدن .. وصل لامنتهاه زيْنةٍ .... لوِّك تشاهدها تحير حرفها الأخير .. من يقلع مداه لا حذفته .. يعني الشي الكثير ✍🖎 |
ويش بنت اعيالها اللي يحضرون
لا نخيت البنت ... جوك اعيالها العيال اربع ... على ما يذكرون سِعد منهم .... يفعلون أفعالها |
ياللي تعس الأرض والأرض خضرا
ما شفتها .. في نجد .. ولاَّ تهاما ان قلت وشهي قلت لك بنت عذرا ما فوقها غيمه .... ولا تحتها ما في عكسها .. تِكتَب وبالعكس تِقرا لاشك. ما اشوف لْها .. عينن تهاما |
بنتن منحنيه حنية الباكور
تبغا الذي يكشف معانيها ميقافها عند آخر الطابور من شكلها تعرف مواريها |
ياويش رجلن يِنعرف بسم وْلده
والولد لاشك هو من صلْب ابوه لكنْ قوي الباس .. من شد بْلده الحل منه يشاف لكن ما اكتبوْه |
ويش رجلن ، ، أوله اسم وْلده
لأنحذف حرفين ،، بيَّنت الولد من قديم الوقت وهذاك بْلده ما عرفته ،، غير من ذاك البلد |
انشدك عن رجّال يسكن برجّال
تلقى مقامه ، ، يا رفيع المقاما أول حروفه لو تشيله،، وينزال يبقى،، مكان اللي عليه الكلاما |
ويش الي معروفن نسبها ياعرب
ترثة عرب،، يوم العصور الفانيه بنتن ليا حطيت لْها راس وذنب يطلع لك غير البنت ، بنتن ثانيه والبنت من حرفين والله ما تغب تلقونها ،، في بطن البنت الثانيه |
رجلن ، له سلطنه وحكم وراي
يجود بعض أحيان ويشاطرك خلك معه بالراي ،، رايح جاي لو ما يساير بالرضا ،، خاطرك |
ياويش رجلن لاحذفت أوله صار
ضد المخاوف ،، بالديار وحماها وليا حذفت اثنين بنهايته ،، دار دارن ،،، يعين الله على ما بلاها هذا الذي في نصرةالدين مغوار ما همه الأخصام ،،، حزت لقاها |
وشهو اللي في حدودك تملكه
بالعوايد ، ، ، والسلوم العامره تملكه وقتن قصير ، ، وتتركه للطويله ، ، والقصير الشامره ذي علوم ، اللي سلكنا مسلكه مانخالف لأمر ،، ضمن أوامره وكل حدن دون حدك ، تدركه غير لاجات المسفَّه ،،، طامره |
لغزنا مضرب مثل،، ماله شبيه
العوارف في حلوله ،، ماتضيع ويش بنتن ،،،، لا بِلي بها نبيه جات بأخواتن لها تضلع ضليع والبنيَّه ،، ما يباها ،،، لو تجيه مير هي وأخواتها معها جميع يوم صارن حِسبَة أصابع يديه ماله في مردِّهن،، قدر وصنيع |
بنشدك عن بنتن في واقعها خـطـر
بنتن علـى الفاعـل ،، لها ردّة فـعـل كله هناديب ،، اللي حـط لْهـا مقـر صارت له نكبةٍ ،، يِضرب بها المثـل |
انشدك ويش الذي اسمه جميل وزان
امصغَّرن،، ما حقرت اسمه وتصغيره رجلن سِمِيّه له عند الناس قدر وشان كذا الوفا والشرف، مع طيّب السيره اليا حذفت أوله ،،، هنا السؤال يبان هات الجواب الذي يكفي ،،، بتعبيره |
رجلن سميّه ،،، مِد شوفك وتلقاه
مابين ضلع وعِرق سهل وطماني لاشلت راسه عيب بالشين تشناه له في زمان اهل الموازين شاني ياما مضى له ،، بين ذولا وذولاه لاشك عهده ،،، من قديم الزماني |
رجلن خبر موته ،،، قبل مماته
سبب غلطه شاع الخبر وذاعي تجاهلوا عطاه ،،،، ومنجزاته نسيو بعَد معها ذيك المساعي قرر يِهْدي على العالم ،، فتاته بنتن تمناها ،، كل رجل واعي |
اللغز جاكم، بأكمل وجه ومحتوى
ما كلّ رماعن ،،، كشف عنه الغطا قبل امس إتطيِّره نسانيس الهوى سِوات الريش يروح مرواح القطا واليوم، جاله وزن وثقل ومستوى حتى لقى مجالن، بين أخْذ وعطا |
انشدك عن بنتين والمعنى خطير
الكل منهن نفس الكلمه ،، تحمله ببطونهن نوايا ،، شرّن مستطير وفعول صاحبهن ما هي بمجمّله تلَقَّاهن رجلن ما يخفاه المصير لولا ذهانته ،،، ما حرَّك ،، أنمله |
اللغز ،،، ما هو للسوالف ،، فلسفه
لغزي،، مثل سهمن عليه إمضاربه اللي يجي ،،، للمنتدى ،، ويشرّفه قلنا هلا ،،، والله يحيّي ،، شاربه للفكر والموروث ،، عِرف ومعرفه أطلق حصانه ،،، والعنان ،، بغارِبه رجلٍٍ على وجهه سرح من موقفه غرب اللي ،، غربيّ الدِّيَر ،، تغاربه طال وقصر ،، وراه ودونه ،، لفلفه من حيث ما وقَّف ،، رست ركايبه والعصر روَّح شرق والمشرق شِفه نوَّخ رِكابه ،،، وأمه ،، ماهي غايبه لكن يسايرها ،،،، وهي مستشرِفه أقفت ،، ولِيا لِفت ،، تَخالِف غارِبه |
بنتن لها وجهين ،،، و بْها قساوه
وجهين فيها عنف وايضا مشدي وجهن يرد اللي يروح ،،، بهداوه والوجه الاخر في طريقه، يودي |
..السلام عليكم..
رجلن سِمِيّه رجلن آخر مذمومٍ ما شاله محبك والآخر ما له بالمفاخر اليا عكسته ،،عند ربك |
يا ويش بنتن بإسمها حي مع حي
تشابكوا ،، مثل السيامي ،،، تواما اللي عن دارنا ،، ورى الحد وشوي جيره ،، وديره ،، من ديار النشاما انا ما قلت وشهي، إلاَّ ، على شي أنقل ،،، تحيات أهْلَها ،،، والسلاما .. |
عذراً تعلَّت في ظهَرها عيْطموس
أبطالها زيد ، وشرف ، وابو رهف أيام الطيبين ،، وانظاف النفوس كلّن بكامل طاقته ،،، عنده شغف أصغرهم اللي لا بناها ،،مايحوس يحطها ،، وهو له مقصود وهدف |
رجلن،، يسابق كل خيرن يجابي
وأظن مامن خير ،، يسبق مجيِّه ان جبت عكسه يا عزيز الجنابي يخفي على جرة خطانا،، خطيه |
| جميع الأوقات بتوقيت GMT. الساعة الآن 10:07 PM. |
Powered by vBulletin® Version 3.8.7
Copyright ©2000 - 2025, Jelsoft Enterprises Ltd.
جميع المواضيع والتعليقات على الأخبار والردود المطروحة لا تعبّر عن رأي ( منتديات قبيلة عتيبه ) بل تعبّر عن رأي كاتبها