المساعد الشخصي الرقمي

مشاهدة النسخة كاملة : وابن العتيبي ينتخي مع دخيله = ماعوده جده على صكة الباب


الدجيما
12-17-2005, 08:01 PM
ان اصدق المح عند الشعراء ماتى من الاجناب وهذه قصيده مهداه الى الشيخ نايف بن عمر بن ربيعان والدكتور زياد بن ثامر الدعجاني للشاعر خالد العبدالله.



يالله ياسايق حقوق المخيله = يالواحد اللي ترزق الناس باسباب
تفرج لمن صارت همومه ثقيله = من بعد ماكل الآمل والرجاء خاب
عامين مرت والوعايد جزيله = والحاصل انه غرني فتل الاشناب
يوم اخلفت ظني نفوسٍ عليله = نصيت انا العتبان عالين الانساب
أهل الشهامه عز من يلتجي له = لو جيت أبا امدح ماكفى عتيبه كتاب
برقا وروق حي والله قبيله = تشهد لهم كل الاعادي والاصحاب
يوم انها وقت السيوف الصقيله = كم سربةٍ من فعلهم شيخها تاب
هاذي موارثهم فعوله جميله = والطيب يبقى ورث والنذل ماطاب
من شان هذا جيت ابا انخى بقيله = نايف وابن ثامر على حل الاصعاب
ابن عمر لاصار بالوقت ميله = فخر القبيله عند ربعه والاجناب
وزياد يذكر له مواقف جليله = مادام هو موجود ماني بمرتاب
سعادة الدكتور رمز الفضيله = لايابعد منهو عن المرجله غاب
موارث الابطال لازم نجي له = هم فزعة المضيوم ياطاح بانشاب
جيت انتخي فيكم ولافيه حيله= الا بربي ثم في حصن الاطلاب
وابن العتيبي ينتخي مع دخيله = ماعوده جده على صكة الباب
الباب مفتوح بنهاره وليله = والنار ضوه تالي الليل شباب
جيت انتخي فيكم لدعوى طويله = طالت موعيدي وانا اليوم منصاب
احس وسط الجوف مثل المليله = الله يصبرنا على هم وغياب
سود الليالي وان عصت نرتكي له = نصبر على جور الليالي والاوجاب
والكون هذا رب موسى كفيله = هو رازق الداب العمى في دجى الغاب
وان ضقت ماجيت الوجيه الرزيله = ماينتخي دايم سوا ابطال وانجاب
ازبن على اللي يحتمون الدبيله = والا الردي للطيب مايحسب حساب
وصلاة ربي عد رمل المسيله = على رسول الدين وآله والاقراب



الدجيما

فهد العايضي
12-17-2005, 10:10 PM
صح لسانك يالدجيما ولسان شاعرها

ولاهنت على هذه الرائعه

تحياتي لك

طالع
12-18-2005, 12:02 AM
لاهنت يالدجيما على النقل

خالـد
12-18-2005, 10:15 AM
الدجيما تسلم اخوي على القصيده الرائعه



تحياتي لك

سالم العتيبي
12-18-2005, 10:36 AM
تسلم على القصيدة يا اخوي الدجيما

الدجيما
12-20-2005, 07:59 PM
الاخ فهد صح بدنك والله لايهينك.

الدجيما

الدجيما
12-20-2005, 08:01 PM
ياهلا والله ومرحبا بك اخوي طالع والله لايهينك على المرور.

الدجيما

الدجيما
12-20-2005, 08:04 PM
مرحبا بك اخوي خالد ولاهنت.

الدجيما

الدجيما
12-20-2005, 08:08 PM
تسلم ياسالم على مرورك ولاهنت.

الدجيما

اخو من طاع الله
12-21-2005, 02:20 PM
تسلم يمينك اخوووي
وصح لسان من قالها ومن نقلها

الدجيما
12-21-2005, 09:13 PM
ياهلا وغلا بالحافي ومشكور مرورك.

الدجيما

سلمان
12-21-2005, 09:56 PM
تسلم مليون يالدجيماء
وصح لسان شاعرهاء
تحياتي

الدجيما
12-22-2005, 08:20 AM
تسلم ولاهنت ياسلمان على المرور.


الدجيما