أمواج هادئة

[عبدالعزيـز الحـربي]

بسم الله الرحمن الرحيم





السلام عليكم ورحمة الله وبركاته





هنا سأدوّن -إن شاء الله- ما أستطيع تدوينه من شعرٌ وغيره , أرجو من الله أن يوفّقني إلى تقديم كل ما هو مفيد .





إحترامي وتقديري لكل من يتابعني هنا .






الإربعاء
10 - 6 - 1433

[عبدالعزيـز الحـربي]

لولا الغلا والشوق بين الاحبـه=مازانت اخلاق العرب ربع ساعه
ولولا الحيا كلٍٍّ وقـع بالمسبّـه=بالسكّه العوجا يزيـد اندفاعـه
لكنّ مـا كـل الحيـا نستحبّـه=بعض الحيا رفعه وبعضه دناعه
من استحى من ربّه وطاع ربّـه=اسلك طريقه كان فيك استطاعـه
ومن استحى لا ينطق الحق كبّه=بعدك عنه في حد ذاته شجاعـه
ولولا الرجا ماينفع الجرح طبّـه=لو ياخذ المجروح جرعة مناعـه
ولولا القناعه يفقد الرجـل لبّـه=في حـزّةٍ فيهـا تقـلّ القناعـه
ولولا الرضى ماتقبل النفس حَبّه=رغم انها ماهي بعصر المجاعـه
ولو ان كل اوضاعنـا مستتبّـه=صارالردا والطيب ربع وجماعه
وتصير حتى قمّة الضلـع خبّـه=والقاع يصبح راس والراس قاعه
ولولا القراده ماعرفنـا التشبّـه=بالغربي اللـي مانفعنـا اتّباعـه
ولولا الغبا ماشيّـد العبـد قبّـه=يقول ادوّر من وراها شفاعـه!
لو كان صاحي ما تشفّع بصبّه!!=عجيب حال المبتدع وابتداعـه!
ولو كل مذنـب للعواقـب تنبّـه=ماقال للشيطان سمعـاً وطاعـه

[عبدالعزيـز الحـربي]

الكلام اللي يجيب العيد ويسبّب مشاكل=أستعذ بالله منه وقول يالله السلامه
الاوادم من لحوم امواتها وشلون تاكل؟=ياوجيه الخير يازين العقل والاستقامه
لو تموت عقول خلق الله بلشنا بالهياكل=أصلاً الانسان عقل وقلب والباقي علامه

[عبدالعزيـز الحـربي]

أنا قريتك في كتاب الشوق واحلام الليال=تآليف همسات الضمير وفهرسة صدق الغلا
وارسلت مندوبي عليك وقلت له روح وتعال=لكنّ مندوبي تآخر ليت ماصابه بلا!
بالمختصر يعني فراقك هزّني يابن الحلال=كلمه وابعلنها على المكشوف قدّام الملا

[عبدالعزيـز الحـربي]

لاصار عندك مشكله وانت مجروح=ابدا بحلّ المشكله واترك الجرح
المشكله حاجه تجي وقت وتروح=والجرح يبغى كشف طبّي مع الشرح
والعلم يبني والجهل دمّر صروح=أحسن تشيّد صرح والاّ اتهدم صرح؟

[عبدالعزيـز الحـربي]

هلا يامرحبا باللي على بالي طرا هالحين=هلا يامرحبابه عدّ وبل المزنه الغرّا
أنا ودّي على وضح النقا واللي يبين يبين=ولاكنّ الخواطر تلتقي داخل ماهو برّا
وانا في خاطري (حاجه) تقول الليله الاثنين=وتقويم الخلاوي من كلام (الحاجه) مبرّا
لكنّ الامر واقع , والهوى والشعر راس وعين=وجسمٍ فيه راس وعين يسري نوب ويسرّا
معاناة المحبّه عذّبت راكان ابن حثلين=وقيس ابن الملوّح , بسّ قيس مع الخلا فرّا
سبقنا بالغرام اجيال كانوا واصبحوا فانين=ماحنّا وحدنا ياللي مقيّد قيد ومذرّا
مقيّدك الشرف واللي تذرّابه رواق الدين=ودونك شرّ منزل لانقلب خير العرب شرّا

[عبدالعزيـز الحـربي]

ياضلع اجا سلّم على خشم سلمى=وبلّغ تحيّاتي لسكّان حايل
حايل وصايفها قمر وسط ظلما =من زارها يلقا لقولي دلايل
عسى المزون المردفه تنثر الما=ويصير واديها من الغيث سايل

[عبدالعزيـز الحـربي]

قالوا جديدك قلت هذا جديدي:=أبيات شعريّه على الطرق الاوّل
الحبّ ساكنّي ومالي وريدي=والشوق مع دمّ العروق يتجوّل
بسّ اشغليني ياقوافي قصيدي=عن الضروف اللي خبرها مطوّل
هذي رساله صادره من بريدي=واللي فهمها يخبر اللي تهوّل

[عبدالعزيـز الحـربي]

هجوسي ياهجوسي ريّحيني ماعليّه زود=ترا ماعاد باقي غير اجاوب روحي بروحي!
والا يامحلّل الافكار ركّز وافهم المقصود=أنا قصدي سموعٍ لو اصيح صياح ماتوحي!
يقولون انت وشبك مختلف يالغايب الموجود؟=نصيحه تعترف وتبيّن الاسرار وتبوحي
وقلت اقول قولٍ مختصر والحاضرين شهود:=(أنا مجروح وعلاجي مع اللي سبّب جروحي)

[عبدالعزيـز الحـربي]

سجّة فكر جتني وانا في مكاني=وصلتبي الصمّان ثمّ ارجعتبي
ياسامعي خذ رمز بعض المعاني=ولياقريت اقرا عناوين كتبي
تدري وش اللي صارلي في زماني؟=وتدري الى وين الدروب انتهتبي؟
أخذ الجواب اللي عليه الضماني=واترك علومٍ لانتحيت انتحتبي
لقيت مخلوقٍ زهمته وجاني=شكله وسيم ونظرته شرشحتبي
قلت استرح قال استرحت وتراني=ماكنت ابجلس والضروف اجلستبي!
قلت القمر والاّ سهيل اليماني؟=قال الثريّا والنجوم اسكنتبي
قلت اعتبرتك واحدٍ من خواني=قال ايه بس عيونك مشوّشتبي
قلت انت مجرم قال مجرم وجاني=واروحك اللي زرتها وابتلتبي
أثر المودّه شكلها شكل ثاني=كيف ابتدت ثمّ انتهت وابتدتبي

[عبدالعزيـز الحـربي]

يامختفي عن عين غاليك فتره=فترة غيابك خلّت الحيل فاتر
ألبستني من لبس الاحزان ستره=لو انّ ما في لبس الاحزان ساتر
(الوصل) ثوب وبشت اماره وغتره=(والهجر) وصفه ماتشيله دفاتر

[عبدالعزيـز الحـربي]

يامعنّيني على غير حاجه وش بلاك؟=وش تفيدك رحلتي وابتعادي وتعبي؟
أنت منهو يرغب ارضك تفاجا في سماك=ومن مشا يمّك رجع عقب ممشاه يحبي!

[عبدالعزيـز الحـربي]

يافجر سلّملي على مطلع الشمس=قلّه إذا شاف الضحى يتّصلبي
وان كان ماشاف الضحى من نهار امس=أكيد تقويم الخلاوي بطلبي
الله يطمس صاحب العولمه طمس=باسبابه ايجاب العرب صار سلبي

[عبدالعزيـز الحـربي]

العيون السود فيها المراره والحلا=أترك التفصيل للي كلامي يفهمه
والله ان الآدمي في حياته مبتلا=والحظيظ اللي ضميره لرشده يزهمه
مار ياقلبٍ تجاوزت مقياس الغلا=المحبّه سرّ والسرّ لازم تكتمه

[عبدالعزيـز الحـربي]

الحبّ تعريفه على النحو الاتي:=صدق المشاعر قبل صدق الجوارح
مشاعـرٍ مابين ذاتك وذاتي=مامِثّلت تمثيل فوق المسارح
على كذا قانون مجرى حياتي=ماهمّني بالنّاس ضاوي وسارح
أكتب على جدار الوله ذكرياتي:=مايقنع الولهان غير التصارح
واسجّ وادله واكتفي في وصاتي=لاقامت افكار الخلايق تطارح

[عبدالعزيـز الحـربي]

يوم اتعذّر عنك واقول كبوه=من باب حسن الظنّ ماهي غباوه
ممشى النقاوه ماتجي فيه حبوه=خَلّ احبيانك وامش ممشى النقاوه
إبليس زارعلك على الدرب عبوه=وان كان ماصدّقت جرّب وخاوه
يصرفلك البخّاخ والربو ربوه=ويعطيك سمّ وتحسب انه حلاوه
وان مارجمته باستعاذه وهبوه=رجمك بسياسه وخبث وعداوه

[عبدالعزيـز الحـربي]

سلام يانور الحياه وعسلها=يامتّخذ من قلب غاليك ملجا
ان كان عندك كلمة انصاف قلها=والاّ ماباقي بالزمن شيّ يرجا
أحسن رضا الاحباب والاّ زعلها؟=والصدق تدريبه اذا استخدم انجا
ياشاكي حمول المقادير شلها=لوّ الظهر مفتوق والرجل عرجا

[عبدالعزيـز الحـربي]

العام اسجّ القدم وامشي على مهلي=واليوم فكري من التفكير متبلّد
يلعبّي الشوق لعب مهاجم الاهلي=بمدافع الاتّحاد اسامه مولّد

[عبدالعزيـز الحـربي]

حتّى وانا اسولف تجيني هواجيس=واجاوب الهوجاس لو ماسألني!
شفت الغرام اللي قتل عنتر وقيس؟=قتلني ومتّ وحييت وقتلني
كلّه سبايب زلّة النّفس وابليس=والاّ وش اللي في غرامك شغلني؟

[عبدالعزيـز الحـربي]

ياساكن القلب قلبك مسكن لقلبي=قلبك سكن قلبي وقلبي سكن قلبك
فيك الوفا ايجابي ومنك الردا سلبي=عنك الردا شَدّ يوم الطيب نازلبك
ان كان لي حَقّ عندك لاتماطلبي=شفني تحمّلت كلّ ايجابك وسلبك

[عبدالعزيـز الحـربي]

البيت من دونك ظلام ومتاهه=ماتنفع اللمبه ولاينفع الكبس
عن غامض المعنى وزود اشتباهه=خذ واقعٍ مافيه شبهه ولا لبس
شفت القمر في منظره واتجاهه؟=يعني غلا عبله قتل عنترة عبس

[عبدالعزيـز الحـربي]

(( نــادوا ســيبـويـه ))



سلام يارجمٍ ليامني بغيت ارتاح اجيه=أسلا عن هموم الزمن وادله واوسّع خاطري
أخير من ضعف الضعيف ومن سفاهات السفيه=اللي بعضهم فيه خصله من خصال الكامري
ليت المنافق يلتزم بالصمت واللي فيه فيه=مار المنافق يكشفه طول اللسان الثرثري
أخفى الحقيقه واظهر الاخرى على باله نبيه=مايدري ان (الغدر) لو يكـتَب (وفا) ما ينقري
اللي مثل هذا صحيح الناس ماتشره عليه=لكنّ مقطوع الرجا منه السلامه تنشري
إيّاك .. ثم ايّاك .. ثم ايّاك .. يالحرّ النزيه=إيّاك تاثق في رفيقٍ طول عمره سرسري
لو حدّك الحظّ الردي على الردي لا ترتجيه=كان الخيار الذلّ والاّ الموت؟ . مت وش تحتري؟
الموت ماهو موت مع موت المشاعر يافقيه=إفقه كلامي يافقيه ولا يهمّك مظهري
دوّر على اللي بالمواقف يحتميك وتحتميه=قدّام يبراك الزمان اللي برا حالي بري
وان كان قولي غامض ومجهول نادوا سيبويه=خلّوه يشرح لابن بطّوطه كلام البحتري

[عبدالعزيـز الحـربي]

ياراكب اللي كنّها سرعة البرق=واقوى من الصاروخ قوّة جهدها
لاشلّعت من غرب في نيّة الشرق=مثل المزون اللي يزلزل رعدها
طيارةٍ وقودها تحرقه حرق=واقوى رادار تمرّ به مارصدها
طيّارها بينه وبين العرب فرق=ماداخ راسه واشتكى من نكدها
أمّا شلعها شلع والا زرق زرق=يالين يصل الديره اللي عمدها
لين المدينه يطرق ابوابها طرق=برسالةٍ مضمونها في سندها
منّا شهادة حق لا زور لا سرق=يوم الشهاده ذمّه لمن شهدها
بالمدح نغرق ديرة المصطفى غرق=اللي بها كلّ السعاده نجدها
فيها ارتبطنا ربطة العرق بالعرق=نعشق حرمها مع قباها واحدها
عشقٍ على وضح النقا مايجي درق=دلايله حجّه على من جحدها
وياكابتن اللي روس جنحانها برق=وَدّ القصيده من ظميرٍ قصدها
وانحربها بعدين ورقان ثم ارق=واقرا عليهم محتواها وعدها

[عبدالعزيـز الحـربي]

بالله ياللي عندكم فزعه وعلم ومعرفه=عندي قضيّه ودّي اعرف حلّها يالغانمين
لاصار عندي شيك حبّ انا احفظه والاّ اصرفه؟=بالذّات في وقتٍ به الاسرار للعاذل تبين
وقتٍ به الدنيا على حَدّ النهايه مشرفه=والصدق نادر والغلا والصدق شرط العاشقين
كم عاشقٍ عانا مع العشّاق والدمع اذرفه=يبغى يخفّف من معاناته وزاد الميّ طين
قام يتمشّى في طرف واد الشقا لين اجرفه=واصبح يردد : مالك الاّ الصبر يالقلب الحزين

[عبدالعزيـز الحـربي]

بالمجتمع ناسٍ يحبّون الازعاج=يزعجهم الجوّ اللطيف بهدوءه
واللي لياشاف العرب رقّدوا داج=تقدر تقول انّه قليل المروءه
أسلم وسلّملي على الشيخ حَجّاج=اللي قبل يرقد يجدّد وضوءه

[عبدالعزيـز الحـربي]

غرّد على تويتر ولاتحسب حساب=ألاّ لربٍّ عنده حساب خلقه
إصدق ولاتسمع سواليف كذّاب=واركد ولاتختفّ مع كلّ طلقه
وان شفت تغريدات زنديق مرتاب=قابل عدوّ الله بالحقّ والقه
إستخدم الحجّه وتسكير الابواب=(الحقّ له في جبهة الشكّ فلقه)
حِدّ المنافق واشغله دام ماتاب=وليانشب في حلقك انشب بحلقه

[عبدالعزيـز الحـربي]

بعض البشر سمّيته استديو اخبار=عنده خبر عاجل وموجز وتفصيل
مصادره تاتيه من كلّ الاقطار=ومراسلينه شلّة القال والقيل

[عبدالعزيـز الحـربي]

رسالة إلى اللي مرسل لي رسالة تهنئة بالعيد :

الله يبارك فيك
وعساكم من عوّاده
وكل عام وانتم بخير


حاولت ارد عليك
لكن مثل مانت عارف نظام المنتدى لايسمح بالرسائل إلاّ بعد 300 مشاركة

[عبدالعزيـز الحـربي]

ياللي بقلبي لك مقام ولك مكانه عاليه....سلام تسليم المحبّه والمودّه والرضا
الحبّ في هذا الزمان وبالعصور الباليه....يفعل كذا واكثر وهذا صاير بعصرٍ مضا
كان السنين الاوله مثل السنين التاليه....لو انها تقضي بحور الارض صبري ماقضا
أصبر على فرقاك والايام مرّه حاليه....واضحك ولو حسّيت في صدري مثل جمر الغضا

[عبدالعزيـز الحـربي]

سوف استمر إن شاء الله بالمشاركات إلى أن أبلغ 300 مشاركة كي أراسل أحد الأصدقاء هنا :biggrin:


يازين الخيزرانة والبرحة و بعض الناس :SnipeR (37):


لا أحد يروح بعيد



هو عارف نفسه :SnipeR (10):

[عبدالعزيـز الحـربي]

السـلام عليكـم ورحمة الله وبركـاته

عدنا والعود أحمد

بعد حوالي اربع او خمس سنوات

أتمنى الجميــع بخير

[عبدالعزيـز الحـربي]

كن القمر فيه لمحه من تفاصيلك
أو بالاصح القمر كنه سرق نورك

مادري سحابك نشا وعيوني تخيلك
والا خيالي سرح واحساسي يزورك

والا سرا ليلي ومثله سرا ليلك
بعض الخواطر تلاقا وانشد شعورك

أو يمكن ان السبب كثرة مراسيلك
اللي تسولفلي بعسرك وميسورك

إن كان للحب ملعب يصلح ل جيلك
دوافع الشوق جمهوري وجمهورك

يازارع الطيب تشهدلك محاصيلك
من بد الادوار كلٍ معجبه دورك

واللي يوجّه عجاجه ناحية سيلك
اترك غديره يضيع ب غبّة بحورك

هذاك لو تختلط شقراه مع خيلك
في كفّة سنين عمره ترجح شهورك

أهل الجهل تبلش بجدك وتمثيلك
لا طبعها طبعك ولا شورها شورك

يامعهد العقل لو تصحي مهابيلك
أصبح مريضك يداوي جرح دكتورك

[إبن ثعلي]

حياك يااخ عبد العزيز ومرحبًا ترحيب المطر
ومتابعين ما يخطه يراعك