صوت & صدى , لشعراء شبكة عتيبه!!

[رغدالشيباني]

http://www.almlf.com/get-4-2011-almlf_com_ep7dsyqe.bmp (http://www.almlf.com)

أخواني وأخواتي
شعراء وأعضاء منتديات عتيبه

لدينا في منتديات عتيبه أسماء شعراء وشاعرات لهم بصمتهم في الساحه الشعريه ولهم تاريخ شعري مليء بالجزاله والإبداع

من هذا المنطلق كانت هذه المساحه الشعريه كمتنفس لشعرائنا وشاعراتنا

الصوت والصدى

مساحه للجميع

لنسمع الشعر ونعيش مع الأحاسيس والمشاعر

:شروط الصوت وصدى:

*ان تكون الابيات من كتابة الشاعر أو العضو ,ويمنع المنقول

*ان تكون على نفس الوزن والقافيه

*ان تكون الصوت والصدى مساويه لعدد الأبيات

*يحق للشاعر ان يطرح مايرغب من صوت وينتظر الصدى ليطرح الاخر

وأول مشاركه لي,


ياحبيبي كل شرهاتي على الصرّافه=كلما جينا نبي نسحب "رصيدك فاضي"
كل شخص يمد رجلينه بقدر إلحافه=والفطين اللي يدقق في "حساب الماضي"

بإنتضاركم :)

[وجودك يكفي]

فكره رائعه

لآهنتي يارغد الشيباني والله يعطيك العافيه

[عادل العصيمي]

شاعرتنا رغد


فكره جديده وفيها تغيير


لكن اللي ابي اعرفه من هو المخول بالرد على الأبيات


الف شكر


,

[نايف تراحيب]

فكره اكثر من رائعه ،

تشكرين عليهآ شآعرتنآ ،

وبانتظآر الصدى ،

:)


احترآمي


/


،

[البارع]

فكره رائده وابيات وااافيه ,,,

وعلى القوه ,,,

ننتظر الاخوه الشعراء ,,

[عبدالعزيز الفرج]

الله يعطيتس العافية أختي رغد على هالفكرة الجديدة


لكن مثل ماقالوا الاخوان من المخول بالرد


لاهنتي

[رغدالشيباني]

وجودك يكفي

ياهلا والله

الاروع مرورك وننتظر مشاركتك الفعليه بصوت و صدى

لاهنت

[رغدالشيباني]

لكن اللي ابي اعرفه من هو المخول بالرد على الأبيات

,

ياهلا , يابن عجلان

والابيات ليست موجهه لشخص بعينه وانما هي دردشه شعريه وكما قلت في المقدمه ان
(الصوت والصدى مساحه لجميع الشعراءومن يجيد فنون الشعر) وليس بالضروره ان تكون الصوت والصدى فتل ونقض بل المهم توحيد الفكره
وان تكون الصوت والصدى متساويه في عدد الابيات واقلها بيت واحد

اشكرك لسؤالك واتمنى ان تكون الفكره واضحه الان

لاهنت

[.*إنـْسَـآن عَـآدِي*.]

عافاك الله شاعرتنا / رغد الشيبانيّ ..

فكرة رائعة ..

وبإنتظار إبداع شعرائنا ..

[رغدالشيباني]

نايف تراحيبياهلا والله

شاكره لك تواجدك

ومالنا غنى عن مشاركتك ياشاعر الملك :)

[رغدالشيباني]

البارع

ياهلاوالله

الله يقويك و شاكره لك تواجدك

[عادل العصيمي]

صوت



ياحبيبي كل شرهاتي على الصرّافه=كلما جينا نبي نسحب "رصيدك فاضي"
كل شخص يمد رجلينه بقدر إلحافه=والفطين اللي يدقق في "حساب الماضي"

صدى


العنب والخوخ والرمان والجوافه = والفواكه كل ابوها تستوي فالقاضي
البنادم يوم يمشي ما يلد خلافه = والمصلي ما يصلي غير كانه واضي

[وجودك يكفي]

صوت



ياحبيبي كل شرهاتي على الصرّافه=كلما جينا نبي نسحب "رصيدك فاضي"
كل شخص يمد رجلينه بقدر إلحافه=والفطين اللي يدقق في "حساب الماضي"

صدى


العنب والخوخ والرمان والجوافه = والفواكه كل ابوها تستوي فالقاضي
البنادم يوم يمشي ما يلد خلافه = والمصلي ما يصلي غير كانه واضي


صحت السنتكم

وما أدري هل الصوت له صدى واحد أو له أكثر من صدى

على العموم هذي مشاركتي والله مدري لو إني مخالف للنظام وطريقة الموضوع وبإنتظار التوضيح


صوت


ياحبيبي كل شرهاتي على الصرّافه=كلما جينا نبي نسحب "رصيدك فاضي"
كل شخص يمد رجلينه بقدر إلحافه=والفطين اللي يدقق في "حساب الماضي"


صدى


راح وقتٍ ترتجينه في قطارٍ طافه = والبقا لله والمومن بحكمه راضي
ويمكن انه عاف زوله عقب شيٍ شافه = والذهين اللي يدقق في خطاب القاضي

[رغدالشيباني]

عبدالعزيز الفرج

ياهلا والله

انظر لرد رقم 8

ومشاركتك بصوت او صدى تسعدني


إنسان عادي

ياهلا والله

شاكره لك تواجدك العطر.

[رغدالشيباني]

عادل العصيمي

صح لسانك ملايين ابدعت يامال الغناه صدى ولا اروع

يعطيك العافيه

[عادل العصيمي]

صح بدنك شاعرتنا رغد


الف شكر


,

[رغدالشيباني]

ولد ثابت

صح لساانك والله مبدع ولاهي غريبه

وماخالفت الانظمه ولاشي ,واهم شي فالموضوع ان تكون الصوت والصدى متساويه فالعدد وبنفس الوزن والقافيه

وكلما كانت الاصداء اكثر كلما زاد جمال المتصفح

مشكور ويعطيك العافيه..

[عبدالعزيز الفرج]

تدري وش اللي يزعل الرجل الفهيم ابن الفهيم؟!! = لاشاف ورث جدوده مع الناس ماله منزلة
والشعر ورث أبوي وأجدادي كريم(ن) عن كريم = ياكثر ناس(ن) تبتلش ورثي ولاهي من هله
حقه علي أحميه من ترديدة الفكر السقيم = وحقي عليه اني ليا احتجته يقول لي ازهله



بانتظار الصدى :)

[رغدالشيباني]

صوت


تدري وش اللي يزعل الرجل الفهيم ابن الفهيم؟!! = لاشاف ورث جدوده مع الناس ماله منزلة
والشعر ورث أبوي وأجدادي كريم(ن) عن كريم = ياكثر ناس(ن) تبتلش ورثي ولاهي من هله
حقه علي أحميه من ترديدة الفكر السقيم = وحقي عليه اني ليا احتجته يقول لي ازهله



صدى




وتدري وش اللي يمرض القلب المعافى والسليم=واللي يسبب للضمير الحي اكبر مشكله
لاصار قلب اللي تحبه من أحاسيسه عديم=وكل الاماني والمطالب مهمله ومكنسله
وتدري وش اللي يخرج النيران من تحت الهشيم =لاثارت ودارت بك الدنيا ودربك تجهله

[عادل العصيمي]

عبدالعزيز / رغد


صحت السنتكم . صوت وصدى من أبدع ما يكون


,

[عبدالعزيز الفرج]

رغد صح لسانتس

صدى ولا أروع ،، أروع حتى من الصوت



عادل ،، صح بدنك


ونبي منك صوت يالغالي :)

[أإحسأإس مجروحَ]

فكرَهـ أكثرَ من رأئعهَ

لآهنتيْ {رغدَ الشيبأنيْ}

[رغدالشيباني]

عادل العصيمي

ياهلا وصح بدنك,واضم صوتي لاخي عبدالعزيز ونبي منك الصوت

عبدالعزيز الفرج

يامرحبا,صح لساانك ملايين وصح بدنك ولانكتفي بهذا الصوت فقط .لاعدمنا تواجدك

احساس مجروح

ياهلا والله ..اشكرك لمرورك اللطيف

تقديري للجميع..

[نايف تراحيب]

صح الله السنتكم جميعاً ،

لله دركم من مبدعين ،

للأمانه نفخر بتوآجد شعراء بهذا الفكر الراقي والجميل ،

وجزالة في ابيآتهم ،

احترامي وتقديري


/


،

[رغدالشيباني]

[نايف تراحيب]

ياهلا والله وصح بدنك

بل نحن الذين نفخر بمتابعتك لنا

كل تقديري

[عادل العصيمي]

صــــــــــــوت


من هو قتل أسامة ابن لادن = امريكا والا مات موتت ربه

[رغدالشيباني]

صح لسانك ولو هي بيتين او ثلاثه احلى :)


صدى





طال الزمن والا الليالي زادن=كان الخبر بفلوس بكره كذبه

[عادل العصيمي]

صح بدنك رغد وصح لسانك على الصدى


القاف صعب شوي ولا ودي أتعب اللي بعدي :)


لا هنتي


,

[عبدالعزيز الفرج]

نايف تراحيب

صح بدنك ياغالي ونبي منك لاهنت صوت :)


عادل ورغد

صحت ألسنتكم ولاعدمناكم

صوت وصدى ولا أروع

[رغدالشيباني]

عبدالعزيز الفرج



يامرحبا وصح بدنك

ننتظر الصوت من ابو تراحيب , وترى الصدى نبيه منك ياشاعرنا :)

[اصايل]

رغد / عادل / عبدالعزيز

صحت السنتكم .
وناطرين البقيه :).

[عبدالله المرشدي]

السلام عليكم ورحمة الله

الصوت



لي مهرةٍ تجمح ماهيب معسوفه=عزة على الفرسان محدٍ عسفها
من صغرها بستانها به قطوفه=تزهر وتبقى فيه محـدٍ قطفهـا
جمالها يبهر وتسحر وصوفـه=يعجز يوفي وصفها من وصفها

[عادل العصيمي]

عليكم السلام ورحمة الله وبركاته


ارحب يابو بدر


وهذا الصدى ..



لن كان روحك يالهواوي لهوفة = ونفسك تدوّر قرب من هو لهفها
السالفة للمسلمين معروفة = لو تنشد الورع الصغيّر عرفها
دور على جاهة لأبوها وضوفه = وخذها من أبوها وعيش بكنفها

[عبدالعزيز الفرج]

عبدالله وعادل


صحّت ألسنتكم يالذيابة ولاهنتو

[عادل العصيمي]

صح بدنك ياعبدالعزيز


,

[عبدالله المرشدي]

ضووووفه

الله الله

صح لسانك ياعادل

ولاهنت

صح بدنك ياعبدالعزيز

تحيتي لك

[عبدالله المرشدي]

الصوت ياسامعين الصوت لاهنتو

ان عودة للسيف ومزارق الشلف =ولا زمنها مالحقنا زمنها
حنا بعصر العولمه مع بعض ولف=علاقةٍ غالٍ علينا ثمنها
عدوانا واصحابنا مع بعض حلف=واحلافنا لاتاخذ العلم عنها

[{ أبوفيصل }]

الله الله

صح لسان الجميع واستلمو صدى الصوت على استعجال والسموحه






صح اللسان ومنطق المرشدي ألف =لو كان هم الناس صحة بدنها
يقوى الهوى شروى الذي بالهوى صلف =ومن لايكيل الْها الروابع وزنها
كم حلّ به طاري على دقة السلف =ويلاَحي لطروق القصايد لحنها

[{ أبوفيصل }]

الصوت ياسامعين الصوت لاهنتو

ان عودة للسيف ومزارق الشلف =ولا زمنها مالحقنا زمنها
حنا بعصر العولمه مع بعض ولف=علاقةٍ غالٍ علينا ثمنها
عدوانا واصحابنا مع بعض حلف=واحلافنا لاتاخذ العلم عنها


المعذرة : عندما طرحت الصدى على عجلةٍ من أمري
واهتميت بالوزن والقافيه ولا عطيت المضمون اهتمامي ،، اعتمد يابو بدر صدى الصوت لاهنت



صح اللسان ومنطق المرشدي ألف =لوكان هم الناس صحة بدنها
العولمه ماعلّمت جاهلٍ جلف =خطو الغشيم اللي غلط ماوزنها
من لايسايرها رجع للورى خلف =وْلا عاد يفيد أهل التميْدن مدنها

[رغدالشيباني]

يامرحبا والله بالجميع

أصايل

ياهلا توّمانوّر المنتدى :) وصح بدنك, شاكره تواجدك

عبدالله المرشدي..
حي الله نباك يالذيب ,وصح لسانك ابدعت ياراعي المهره. شاكره تواجدك

عادل العصيمي..
صح لسانك وياسلام عليك جاهه وضوفه :) لاهنت

عبدالعزيز الفرج
يامرحبا شاكره تواجدك

عبدالله المرشدي
ابيات رائعه صح لسانك ملايين

خليجي
يامرحبا والله وصح لسانك ملايين تواجدك اسعدني كثيييير.

تقديري للجميع

[عبدالله المرشدي]

صح بدنك

ياخليجي

وصح لسانك

صدى جميل

ورد وافي لاهنت

[رغدالشيباني]

صوت


ياناس ماشفتوا قناة( العالم)=قناه شيعيه وليبراليه
لكن تبث الخافي المتخبي =وآخر علوم الثوره السوريه
وأخبارها شي ٍ صحيح وواقع=والشي الآخر فبركه وهميه
صرنا ضحيه للعدو الكاذب=وقالو علينا الامه الرجعيه
سيناريو هالفلم جداً واضح=وعلامة الجوده ديموقراطيه

[عبدالعزيز الفرج]

الصدى ياراعية الصوت



يابنت شفنا مايغث العاقل = ويطلّعه في حالة(ن) نفسية
عشنا وشفنا فالدهر ماعفنا = عبر الفضا وعلومه المرئية
قامت قنواته تزيد وتكثر = الغث واجد والسمين بليّة
والشيعة تخطط لشي(ن) كايد = يبون نهب الدانة المرعية
ويلمعون مع الفضا صورتهم = لكنها مكتوبة(ن) مقرية



صح لسانتس يارغد

[العنود البريكي]

ماقصرتي ياشاعرتنا

[البارع]

مشاركة في هذا الموضوع الجميل ........ والحمدلله ان الصوت عنديـــ

مايزيد الضيق في وسط الصدر
قل مال وقل حال وقـل ربـح
غير لامن فاتني فرض الفجـر
والله انه ماذبحني صدق ذبـح
كيف وهو النور لاغاب السفر
مثل ليلٍ بدده ظهـور "صبـح"

[شركة توازن]

شكرا لك

[رغدالشيباني]

ياهلا والله بالجميع

عبدالعزيز الفرج

صح لسانك وبدنك ملايين شاعر متمكن والصدى اروع من كل ابو حاجه :)

البارع


ياهلا وصح لسانك لو ان القاف معقد شوي

لكن صح لسانك وننتظر الصدى

تقديري للجميع
,
,

[ابشرررك ادمنتك]

وايمانا مني بقلم يختار اجود المفردات ...ماذا أقول لكـ يا سيد الحرف ومنبع المعاني ...كلمات اجبرتني علي مشاركتكـ لاحساسي بصدقها ... وبستان الكلام المعطره لك كل مني خالص التحيه

[زيزوم برقا]

من سعى لله يبشر بالظفر=والعوادي للأجر والخير ضبح
كل خطوة ترتفع عز وقدر=يا بعيد الشبح لا يغويك شبح
اغز شيطانك بآيات الذكر=دام شيطان الهوى يحتاج كبح

مودتي

عبدالمحسن العصيمي

[رغدالشيباني]

عبدالمحسن العصيمي

يامرحبا والله

وصح إلسانك ملايين.صدى رائع وأبيات جزله تخفي شاعريه فذه خلف هذا المُعرف

ألف شكر لك,ونطمع بالمزيد من التواصل ..

تقديري

[عبدالعزيز الفرج]

صح لسانك ياعبدالمحسن ملاييييين ولا تسدك

سويت ما قد يعجز عنه غيرك !!


لا هنت

[رغدالشيباني]

صوت


رزقي على اللي خالق الأنس والجن =والا البشر مامنهم إلا الأذيه
شرواك يعطي والعطا يتبعه مّن =وشهو عطاك اللي تمنه عليه

[آلعطـ خ ــآوي]

صدى

[آلعطـ خ ــآوي]

صوت


رزقي على اللي خالق الأنس والجن =والا البشر مامنهم إلا الأذيه
شرواك يعطي والعطا يتبعه مّن =وشهو عطاك اللي تمنه عليه

صدى

يالله عطنا سلوت البال والمن ... يامعطي الحسنه تغفر الأسيه

راس القناعه كنز يامحسن الظن ... لنكان رغد العيش عيشه هنيه

[آلعطـ خ ــآوي]

يمكن لي اجيب بيتين شعر من عندي (صوت) ويرد عليه اي شاعر من الشعار

[رغدالشيباني]

حياك الله يا عطاوي

وصح الله إلسانك

يمكن لي اجيب بيتين شعر من عندي (صوت) ويرد عليه اي شاعر من الشعار

هاات اللي عندك المجال مفتوح للجميع
لمعرفه المزيد ارجو الرجوع للصفحه الاولى من الموضوع :)

تقديري

[آلعطـ خ ــآوي]

صح بدنك والله يوفقك

[آلعطـ خ ــآوي]

الصوت ياسامعين الصوت

[آلعطـ خ ــآوي]

صوت (ن) ينادي .. عيّدوبه قبل عيده =يصيح من جور الطغا والطواغي
يامن خبر له ضب ياكل رديده =ولاّ هدير ابعير واليوم راغي
عوّد على العزّل وشعب (ن) يبيده =وخلاّك يالجولان في وضع لاغي

[آلعطـ خ ــآوي]

بعد تعديل اول بيت
الصوت ياسامعين الصوت



يثور بركان الغضب في وعيده =والقصف مايدري بطفل (ن) يغاغي
صوت (ن) صداه يذوب قمة جليده =ينهار من جور الطغات الطواغي
يامن خبر له ضب ياكل رديده =ولاّ هدير ابعير واليوم راغي
عوّد على العزّل وشعبه يبيده =وخلاّك يالجولان في وضع لاغي