لغز كيبوردي اهديه من باب التنشيط . حله وجودك يكفي ، صح لسانه

[{ أبوفيصل }]

صلوا على النبي المختار محمد سيد الأابرار
لغز من باب التنشيط وليد هذه اللحظه أتت فكرته متواضعه بصياغةٍ بديهيّه
اَمل ان يحوز على رضاكم



أنا بنشــدك عن ورعٍ خـفيٍّ عن كـل تفّـاق = يجي له في مغـالـيقٍ بلياّ باب مزاليـجه

ولْيا ماح به ميّاح وأصبح فيه مِشَـل وافْتاق = عوّد في ذبيل اكحيْل وانْدَجّت مداليجه

[وجودك يكفي]

صح لسانك ياخليجي وبيض الله وجهك على اللغز الرائع

جااااري التفكير والبحث المكثف

[{ أبوفيصل }]

صح بدنك

بانتظارك يالذيب

[الصهد]

مسيت بالخير خليجي وصح لسانك ياذيبان
مافيه خيارات ولا اتصال بصديق ولاهنت

[{ أبوفيصل }]

مسيت بالخير خليجي وصح لسانك ياذيبان
مافيه خيارات ولا اتصال بصديق ولاهنت


مسيت بالنور يالصهد ،، صح بدنك

الخيارات لاتجدي بالألغاز لكن لايمنع الأتصال بصديق :) وانت لاهنت ولا هان غاليك

[وجودك يكفي]

لازال التفكير جاري والظاهر ماني حوله ياخلجي

[{ أبوفيصل }]

لو قلت هالحين ماني في حاله صدقتك لكن تقول ماني بـ حوله
ماني مصدق ابد ياوجودك وانت ملك الحلول واسمك على كل عنوان تجتاحه كالليث المزمجر :)

كثف تركيزك فالبيت الأول طيب

[وجودك يكفي]

ماعليك زود ياخليجي

أنت كذا وهقتني ههههههههههه

الله يجيب الغايب وأنا اخوك

[الجـوهـره]

صح السانك
اللغز يبيله مترجم ..تفاق؟؟
يمكن المقصود بالمغاليق بليا باب الي هي الارقام السريه بالجوال
يمكن اكون ماني حوله

[{ أبوفيصل }]

حياكـ ِ الله يالجوهره ، لاأرى مايستدعي لترجمة لهجتنا
فهي من أصل لغتنا ومفرداته الأصيله

معنى التفاق : البواردي الصياّد ،، والتفاق مشتق من التفق صوت البندق القديمه

وأي كلمه تزرقن معك حاضر وممنون ماعليكـِ

[وجودك يكفي]

ياخليجي والله ودي أذبحه وافقع عينه ولكن ماودي أرمع على اللغز رمع عشوائي

وأنت الظاهر إنك شايب هههههههههه عسى الله يطول عمرك على الطاعه

بسأل عن بعض المعاني عشان نستوعب اللغز ونحدد أوصاف الورع المطلوب وبإذن الله يجتهدون الأعضاء ويجيبون لك هالورع برقبته


ولْيا ماح به ميّاح وأصبح فيه مِشَـل وافْتاق = عوّد في ذبيل اكحيْل وانْدَجّت مداليجه

وش معنى ماح به مياح ،، مشل ،، ذبيل اكحيل ،، اندجت مداليجه

[روقي قرم]

صح لسانك ياخليجي

ممكن المرور السري

[{ أبوفيصل }]

ههههههههههههه

هلا بوجودك ،، عمري >> لوتجمع عمر فهيد وابن ثعلي الله يطوّل اعمارهم وتقسم الناتج على 2 = ماجيت سنين واحدٍ منهم ههههه

:) ابشر بالتوضيح اللي تباه ،،


ميّاح : يطلق على كل رجلٍ ينزل فالبير ويميح بالدلو للّي فوق من ربعه حتى يجذبون الماء .

مشل : يعني فتق مخيوط

ذبيل اكحيْل : سالفه لامجال لسردها لكن معنى مفرداتها
ذبيل : يعني فايده ،، اكحيْل : اسم رجل

اندجّت : انكفت وساحت
مداليجه : مثل قولة مثاعيبه وسلامتك ومن يسمع

مابعد توضيح المعاني غير الحل :) انتهى

[وجودك يكفي]

بيض الله وجهك ياخليجي وعزالله ماقصرت بالشرح الوافي

جاري التفكير

[{ أبوفيصل }]

روقي قرم ،، صح بدنك

مالك لوا ،،،،،،

:)

[{ أبوفيصل }]

ووجهك ياأبيض الوجه ،، هذا من ذوقك وطيبك


بنتظارك وعلى أااال من مهلك ياباشا :)

[وجودك يكفي]

وش تقول ياخليجي في هالرمعه

الورع هو اللغز نفسه والتفاق هو الرامع

وصاحب اللغز يخفيه عن عن الرامع ويحط له مفاتيح توصل لجوابه

[عزيزة الجناب]

خليجي

اقول يبي لي ترجمه اخرى

والله الغز صعب

القي السلام عليكم

واقول وجودي دونك اللغز حله ونتوجك بملكية حل الالغاز

[سعد الشدادي]

صح اللسانك ياخليجي ولي رجعه لذبحته ان مااحد سبقني عليه

[{ أبوفيصل }]

رمعه لايعلى عليها غير الحل :)

محاوله ثانيه ياكبتن خطيييييييييييييييير

[{ أبوفيصل }]

ياعزيزة الجناب ابارك لك على المعرف الجميل

اتوقع مابعد الشرح شي ووجودك يكفي أوفاه واقتنع فيه

بس ماودكم تفكرون فيه

[وجودك يكفي]

وش رايك في جواب اللغز

[{ أبوفيصل }]

صح بدنك ياسعد والله الظاهر الظاهر مايمديك ترجع غير هو يطلبك الحل

هههههههههه

[{ أبوفيصل }]

مالك لوا ياوجودك وانا داري رمعتك الأوله ماتجي غير تمهيد للقاضيه

:)

[{ أبوفيصل }]

ياوجودك ركزت في البيت الأول والثاني في طيّاته تكمله لمعناه
حسب ماوضحت

[وجودك يكفي]

افكر بصمت:
ورع صغير ومختفي عن كل رامي
له مغاليق وماله باب وله مزاليج
إذا حركه احد ينشق وينفتق
ويصبح مثل فايدة كحيل بعد انسكب وسالت مثاعيبه

جاري التفكير في هالورع المختفي

[{ أبوفيصل }]

لك أن تفكّر بصمت دون أن تزئر يالضرغام
ثم زمجر وفكّر بصوت عالي

:)

[عزيزة الجناب]

ياعزيزة الجناب ابارك لك على المعرف الجميل

اتوقع مابعد الشرح شي ووجودك يكفي أوفاه واقتنع فيه

بس ماودكم تفكرون فيه


خليجي

الله يبارك فيك

هاه بشروني احد حل اللغز والا تدخل بنت روووووووووووق بثقلها السياسي والمالي والفكري

وما عليكم زود وحده انعدت بالمغرورات حول العالم

[{ أبوفيصل }]

انا ووجودك يكفي لانكتفي بوجودك
تدخّلك يشبه شيهانةٍ حوّلت من فوق يابنت روق

:)

[وجودك يكفي]

ياخليجي وش تقول في اللغم مختفي تحت الارض عن كل جندي ورامي
وإذا حركه احد تطرشع وانفتق

[{ أبوفيصل }]

شي محسوس غير ملموس

اتجاه رمعتك الأوليّة طيّبه
ماهي بعادة رصاص بندقك يزم :)

[وجودك يكفي]

وش رايك في هالمقوله

المعنى في بطن الشاعر

[{ أبوفيصل }]

مالك لوا ،،

[وجودك يكفي]

مدام إن الورع المختفي ماقدرنا نظهره من مغاليقه
وش رايك ياخليجي نقسم اللغز قسمين القسم الأول يخص الورع المختفي والقسم الثاني يخص التفاق


وبتكون الرمعات على تحديد التفاق وإذا عرفناه قطعنا نصف المشوار نحو الجواب و أكيد راح يساعدنا في معرفة الورع المختفي


وهذي رمعات تحديد التفاق وإذا كان بينها رمعه صحيحه حددها لنا عشان نبدأ نفكر في الورع المختفي
وش رايك في: النضول : رامع الالغاز : بواردي الصيد : جندي المعركه

[{ أبوفيصل }]

مالك لوا ياوجودك
مفهوم الورع الله يحفظك ويحفظه واحد ولايقبل التقسيم

:)

[{ أبوفيصل }]

مدام إن الورع المختفي ماقدرنا نظهره من مغاليقه
وش رايك ياخليجي نقسم اللغز قسمين القسم الأول يخص الورع المختفي والقسم الثاني يخص التفاق


وبتكون الرمعات على تحديد التفاق وإذا عرفناه قطعنا نصف المشوار نحو الجواب و أكيد راح يساعدنا في معرفة الورع المختفي


وهذي رمعات تحديد التفاق وإذا كان بينها رمعه صحيحه حددها لنا عشان نبدأ نفكر في الورع المختفي
وش رايك في: النضول : رامع الالغاز : بواردي الصيد : جندي المعركه

عذراً رفيقي أكرّر عذري قد قرأت ردك أعلاه بسرعه وانا على عجلةٍ من أمري
نعم لك ان تقسّم كما تريد وتبحث عن هذا التفاق وصاحبه
الى أن تقبض عليه بالجرم المشهود

:)

[وجودك يكفي]

معذور معذور يالوافي ومايلحقنا فيك شك يالغالي


الله يجيب الغايب وانا اخوك

[{ أبوفيصل }]

ماباقي غير طول ذنيب الجربوع :) وانت ياوجودك توجهت حتى كدت ان تقضي عليه
ولكن ما ودي أطيعك في اقتراح التقسيم ويقع المحظور
لذا عطني جواب محدد فيما ذكرته انت بعاليه عن هذا التفّاق حتى تجد ذلك المتخفي

[وجودك يكفي]

طيب طيب هذي رمعه تخص التفاق وإذا عرفنا التفاق رجل الديك تجر الديك وبإذن الله نجيب الورع المختفي

إذا قلنا رامع الالغاز هو التفاق وش تقول

[{ أبوفيصل }]

مالك لوا

[وجودك يكفي]

نقول التفاق الرامي الصياد في وقت القنص والصيد

[{ أبوفيصل }]

مالك لوا

بعد اذنك لي عوده بعد قليل

[وجودك يكفي]

خذ راحتك وبإنتظارك عشان تعطينا رايك في النضول إذا قلنا إنه هو الرامي

[عزيزة الجناب]

انا ووجودك يكفي لانكتفي بوجودك
تدخّلك يشبه شيهانةٍ حوّلت من فوق يابنت روق

:)


خليجي تسلم

اذا ملك حل الالغاز ماقدر وش اسوي

وش رايك ف البندق والرصاصه

حولها والابعيد

[{ أبوفيصل }]

مالك لوا ياوجودك

[{ أبوفيصل }]

سلمتي ياعزيزه
مالك لوا والرمعه بعيده يابنت روق

[وجودك يكفي]

وش رايك في السر بين الشخصين ومغاليقه داخل صدور الرجال

[{ أبوفيصل }]

وش رايك في السر بين الشخصين ومغاليقه داخل صدور الرجال


صحيح السر

صح لسسسانك

أحلا مافاللغز ياوجودك .. لا .. يُدان قاتله


وانت قمت بقتله مع سبق الأصرار


:)

[وجودك يكفي]

صحيح السر

صح لسسسانك

أحلا مافاللغز ياوجودك .. لا .. يُدان قاتله


وانت قمت بقتله مع سبق الأصرار


:)


صحححح بدنك يارفيقي والحمد لله يوم الله جاب الجواب

هههههههههههههههه ادانة القتل مصيبه والحمد لله إن الألغاز دمها مهدور... ولو فيه من يطالب بدمها كان ماقربناها

بصراحه لغز امتعني كثير والله يعطيك العافيه ياخليجي وبيض الله وجهك

[عزيزة الجناب]

الله طلعت ملك من جد

ماشاء الله عليك

لاهنت خليجي

مبروك وجودك

بغيت اقول الباسوورد هذا اللي خطر ف بالي تلك اللحظه

موصح بس قربت

[وجودك يكفي]

الله يبارك فيك ياعزيزة الجناب ولآهنتي

[بن فريح]

صلوا على النبي المختار محمد سيد الأابرار
لغز من باب التنشيط وليد هذه اللحظه أتت فكرته متواضعه بصياغةٍ بديهيّه
اَمل ان يحوز على رضاكم



أنا بنشــدك عن ورعٍ خـفيٍّ عن كـل تفّـاق = حطّــوْ له مغــالـيقٍ بلياّ باب مزاليجـه

ولْيا ماح به ميّاح وأصبح فيه مِشَـل وافْتاق = عوّد في ذبيل اكحيْل وانْدَجّت مداليجه

اسعد الله اوقاتكم بالخير والسعاده برضاه
صح لسانك اخوي المبدع خليجي
على اللغز الجزل
وش قلت طال عمرك بالقلم وريشته وغطاه
او قماش فرامل السياره
دمت بحفظ الله

[{ أبوفيصل }]

عزيزة الجناب وانتي لاهنتي

[بن فريح]

صح لسان راعي اللغز واللي حله
وكل من شارك وحضر
وتوي شفت الحل
دمتم بحفظ الله

[{ أبوفيصل }]

ابن فريح صح بدنك اخوي

هلا ومرحبا بمطوّل الغيبات

مالك لوا واللغز انحل

[بن فريح]

ابن فريح صح بدنك اخوي

هلا ومرحبا بمطوّل الغيبات

مالك لوا واللغز انحل

الله يسعدك ياخليجي
قلبي معكم طال عمرك حتى لو غبت
ومن حضر ماكأنه غاب
والمعذره اذا قصرنا
حفظكم الله برعايته

[وجودك يكفي]

هلابك يابن فريح والحمد لله على السلامه وآخر الغيبات يالغالي

صح بدنك ولآهنت