لغز شعبي ،، حله وجودك يكفي صح لسانه

[روقي قرم]

ياهل الالغاز خوذو آخر الملغزه= ويش بنتاً عجيبه عين ماهيب غين

من تقرب قداها يبشر ابــملغزه=ومن يسايس بيطعم زين ماهوب شين



اتمنى اني وفقت في صياغته ولاوصيكم عليه

[واقع من الخيال]

خلية النحل

[روقي قرم]

رمعه طيبه

بس
مالك لوا

[وجودك يكفي]

صح لسانك ياروقي قرم والله يعطيك العافيه
وش تقول في داب ذريع

[{ أبوفيصل }]

صح لسانك ياروقي قرم ،، البلا ان كان ماللبنت عين ونبلش بها ههههه
ياروقي طالما انها عين أظنك تقصد في بيتك قذاها ماهو قداها صح

داب ذريع ياوجودك مذكر والمطلوب عين هالبنت العجيبه

وش رايك في ( عشة الطير ) أولها حرف عين

[وجودك يكفي]

‏^‏^
ههههههههههههه عين الماء اللي عليها داب ذريع

[{ أبوفيصل }]

عين السيح اسمعها من اخواننا بالكويت

[وجودك يكفي]

عين القز

[{ أبوفيصل }]

يا عنك انها عين القز ، من يسايسها يبا يطعم لعيشته طعم

صح لسانك ياروقي ولسانك ياولد ثابت ، فقع عينها هههه

[{ أبوفيصل }]

فيه رمعتين مع العلم ان رمعة وجودك اشوفها عين الصواب :)
بانتظارك ياروقي قرم ترد على الرمعات

[{ أبوفيصل }]

ياروقي قرم أنت وين رحت ؟

لغزك يذكّرني بواحد يعاين في واحد فوق عينه حبّة خال .. قال له : بالله عليك هذي عين والا غين ؟

هههههه >> أمزح معك لأنك من خوياي

[روقي قرم]

صح ابدانكم

ومالكم لوا

رمعاتكم طيبه مره

ولكن ماهوب اللي ابيـه

[الصهد]

صح لسانك روقي قرم
يقولون ان فيه طب حديث نغزه
مدري بدبوس النحل يعالجون بها
حولهاولا مع جنب القده

[عزيزة الجناب]

روقي قرم صح لسانك

امممممممممممممم

اظنها الدنيا

انتظر ردك

[{ أبوفيصل }]

:z039:والله ما اعتقد انكم حول حل
انا ووجودك يكفي نفحط ماخلينا بنتٍ لها عين ماقلناها

دورو غيرها ياللي فوق كلكم

[الأدميرال]

السلام عليكم ورحمة الله وبركاته
ولاهنت يامحمد على طرحك للغز
انا اقول يمكن الشمعه>>>>شكل الرمعه معطيه الجاده بس مسكت معي انها الشمعه

[روقي قرم]

صحت ابدانكم

ومالكم لوا يالصهد ويالرمانه و يالادميرال

[{ أبوفيصل }]

روقي قرم استلم هالرمعه

وش تقول في عين شمس ،، الجامعه المعروفه في مصر

[آلعطـ خ ــآوي]

وش قول في"آلدموع" آو "دمعه"

[سعد الشدادي]

روقي قرم صح اللسانك وش تقول بعين الماء

[روقي قرم]

مالكم لوووا جميعا

فيه رمعات تروح وتدور حوله

[عزيزة الجناب]

روقي قرم

اممممممممممممممم

عين زمزم اوماء زمزم

وش رايك

لاتقول مالك لوا

وربي لقولك عين زبيده

واشوف وين اوصل

[الصهد]

مسيتو بالخير وصبحكم بمثله الله يكفينا شر العين
رمعه تمشي الفين العين بمعنى الحسد او العين نفسها
انتبه ياخليجي
ماشاء الله عليك لا ينظلونك
بشر يالذيب ويمكن انها عين زبيده

[{ أبوفيصل }]

مسيكم بالخير

الله يسعدكم ،، رمانه والصهد كلاهما رمعتهما خطيره وانا اشوف الصهد
* العين راحت فيها يارمانه صبركم عليها شوي :) خطيره

* يالصهد انا كل ماقلت ان اللغز راح قام يزداد عناد ههههههه

استلم هاذي


اشوف عين اللغز زايد عناها =وأظن رمعتكم تجيب الصعيبه
لهيب نارك يالصهد من سناها =لاجات فـ العين العجيبه تصيبه

[الصهد]

استلمنا يالذيب
تقنع الى منه تحقق مناها
يالله عسها ياالعتيبي قريبه
الناس تال الوقت جاها عناها
مشاكل وايضاً امور عحيبه
وتصبح على خير مسراح الصبح وانت خابر
واسهرتني ببويتاتك
اللي واحد دبلكس والثاتي عظم ههههه
واثق الاخ من ابياته
وان شاء الله اني وفقت ببويتاتي واللغز محير،،،

[روقي قرم]

ودي اقول صح عليكم بسسس مااش محد فقع عين اللغز


مالكم لوا جميعا :)

[عزيزة الجناب]

ههههههههههه

اخر ما توصل له عقلى

انك تقصد عين اللغز نفسه جت بس مادري كيف جت

واذا موصح

عدسة الكمرا اوعين الكمرا

المهم حولها ندندن

لاهنت

اخر ماعندي

[الصهد]

ياهل الالغاز خوذو آخر الملغزه= ويش بنتاً عجيبه عين ماهيب غين

من تقرب قداها يبشر ابــملغزه=ومن يسايس بيطعم زين ماهوب شين



اتمنى اني وفقت في صياغته ولاوصيكم عليه

وش رايك في عين القطط
الله من واحد ياروقي قرم وقعت بقزازته
بشر يالذيب

[أمير الشباب]

روقي قرم

التفكير جاري

صح لسانك

[{ أبوفيصل }]

روقي قرم ،، عساني ماأبكيك أقول لكثرة العيون ابا أعطيك كذا عين وانت تخير فيها
طبعاً غير المذكوره ،، مافيه لين نشوف اخرة هاللغز وش يرسي عليه :11:

عين الحقيقه
عين عذاري
عين ابن فهيد
عين الحلوه
قرية ذي عين
العين ،، الأماراتية
عين شعار الأمن
أخيراً عين الله ترعاك ياصاحبي

[روقي قرم]

يالربع

قلت بيطعم زين ماهو شين ؟؟ فيه احد يطعم بدون اكل

وللعلم قلت شعبي شعبي شعبي

يعني قديييييييم ممكن محد يعرفها

لازم احد يبخصها وقد اكل منهــا>وضح

[سعد الشدادي]

اخوي محمد الثبيتي عندي رجال شرواك ويقول بيذبح هاللغز
النار-الجمر

[روقي قرم]

مالك لوا انت وياه

[{ أبوفيصل }]

أجل ماهي بـ عين > أكله

وش تقول بالمطازيز ،، المصابيب ،، المرقوق ،، الثريد ،، المعصوبه عاد انت تخير منها
وانا اقول ( عصيدة الحنطة ) ولا تنسا تحلي بحاجه اسمها ( عيون المها )

ياعيني أكلات أديمه ولزيزه أوي ومحدّش يأْدر يئاومها :18:

بانتظارك

[بنت المريبض]

مشكوور اخووي ع اللغز اللي دوخناا
يعطييك العافييه

[الأدميرال]

بيض عيون نص استوى

[روقي قرم]

مالكم لوا

اللغز شعبي ياكلونه الباديه قبل يكون جاهز ماهم يسوونه

اللغز عرضته على كذا واحد وقال صح لسانك وارد

[{ أبوفيصل }]

وش تقول في فاكهة البرشومي >> (التين الشوكي)

أو ( الحِوَّا والبسباس )

[jnan.511]

عشاك عندنا

[{ أبوفيصل }]

روقي >> دخنا
بس عساه ماهو باللي في عشا جنان ،، تقول لك عشاك عندنا :12:

على فكره تراك مطالب بالتوضيح عماّ قريب

[شيخ الشيوخـ]

اللغز اللي مايحله وجودك يكفي اشك فيه

<< قلب على محمد


ولي رجعه بعد التفكير

[روقي قرم]

هههههههههههه

اللغز لو بقول جوابه فيه ناس مايعرفوونه او مايدرون عنه

لكن اذا ماحله ابن ثعلي بنقفل الصفحه وبلاش لغز :)

[وجودك يكفي]

وش تقول في عين بعارين:
نبته بريه موسميه وتنبت في الاراضي الصلبه ولها أوراق رمحيه كبيره

[وجودك يكفي]

اللغز اللي مايحله وجودك يكفي اشك فيه

<< قلب على محمد


ولي رجعه بعد التفكير


ماهو على كل حال ياشيخ الشيوخ وترى الرمعه إللي تصيب تجي صدفة وتوفيق من الله

[شيخ الشيوخـ]

صورتك الرمزية انت اولى الناس بها وهي تنطبق عليك ياوجودك يكفي
ولاتغيب عن موقعنا ترانا نحبك :)

[روقي قرم]

صح لسانك ياوجودكوالجواب عين البعير او عين الجمل او شدق الجمل كثيره اسماء النبتــه
لمن لايعرف النبته
الصوره
http://www.alwaadi.net/nbatat/jamal.gif

[وجودك يكفي]

صورتك الرمزية انت اولى الناس بها وهي تنطبق عليك ياوجودك يكفي
ولاتغيب عن موقعنا ترانا نحبك :)
‏

أبشر يالأمير وماتحب غير شخصن يحبك ويغليك عسى عمرك طويل وربي يحفظك

[وجودك يكفي]

صح لسانك ياوجودكوالجواب عين البعير او عين الجمل او شدق الجمل كثيره اسماء النبتــه
لمن لايعرف النبته
الصوره
http://www.alwaadi.net/nbatat/jamal.gif

صح بدنك يالروقي القرم والله يعطيك العافيه

[{ أبوفيصل }]

ابك ابك قد طرت علي لكن استبعدتها لأن البنت مؤنث باللغز والجمل مذكر
،، ونسيت النبته صح لسانك ياوجودك على الحل القاضي وصح لسانك ياروقي على اللغز الرائع
نعم لغزك وارد

[روقي قرم]

اخيرا فقعوا عينـه :)

صح بدنك ياخليجي

شيخ الشيوخ الحين لغزي طلع لغز اجل هع:20::20::20::20::20::20:

[الأدميرال]

ياسلام على عين البعير معلومه جديده لنتبه تحمل اسم كائن عظيم
وجودك اصبت عين البعير وعويدك يالذيب

محمد لغزك هذا قوي ولاهنت
نبا مثل هاللغاز

[وجودك يكفي]

ابك ابك قد طرت علي لكن استبعدتها لأن البنت مؤنث باللغز والجمل مذكر
،، ونسيت النبته صح لسانك ياوجودك على الحل القاضي وصح لسانك ياروقي على اللغز الرائع
نعم لغزك وارد

صح بدنك ياخليجي ولآهنت

[وجودك يكفي]

ياسلام على عين البعير معلومه جديده لنتبه تحمل اسم كائن عظيم
وجودك اصبت عين البعير وعويدك يالذيب

محمد لغزك هذا قوي ولاهنت
نبا مثل هاللغاز
صح بدنك يالذيب ولآهنت ياصديقي الغالي

[شيخ الشيوخـ]

انا معلمكم :)

محمد انت ماتجيب الا الجزل ياجزل بس حبيت امازحك وطلع كلامي في محله

[وجودك يكفي]

88

ردك هو إللي حمسني والحمد لله يوم الله وفقني