لغز.. لأبن ثعلي وشيخ الشيوخ ومدهال .. توصل للحل ]أبن ثعلي[

[وجودك يكفي]

‏ ‏ ‏
مساء الخير

اللغز هذا كتبته قبل ساعة بعد ما قريت رد الادميرال الأخير في لغز الجزيرة

واللغز للجميع ولكن ذكرت ثلاثه في عنوان اللغز عشان الادميرال

وهم ابن ثعلي وشيخ الشيوخ ومدهال ‏



يقول اللغز:


ويش الذي ينفعك ويمكن يدينك=يمشي بامر غيره ولايملك اقدام

واحد من عياله تشوفه بعينك=وله ورع قالوا لي من ديار صدام

وبنته على رجال دايم يعينك=بالوزن ماتنزل وتطلع لها احكام

وعياله الباقين بيني وبينك=ماجالهم طاري ولغزي ترى صام

[الأدميرال]

وبنتظار ابن ثعلي وشيخ الشيوخ ومدهال
*__*

[وجودك يكفي]

ودي أقولك الحل يالادميرال بس ابن ثعلي يشوف الرسايل وانا أدري إنه إذا شاف الحل بالرسايل مايجاوب ولا يشارك في حل اللغز مثل طريقته في لغز الجزيرة

[الأدميرال]

هنا المشكله بس بنضيعهم
عندي حل

[وجودك يكفي]

ابن ثعلي شايب تلقاه نايم هالحين وشيخ الشيوخ اتصلت به وقال أنا ماني حول النت ولكن أرسل اللغز برسالة على الجوال ومدهال كلمته يقول اطرحه اطرحه>> طرحناه يالذيب وينك ؟؟

[الأدميرال]

خلهم على راحتهم و اللغز مثبت ومن جاء منهم الله يحيه

[وجودك يكفي]

جااااري الإنتظار واللغز للجميع ولكن الثلاثه مطلوبين بشكل رسمي

[الأدميرال]

سلام
للحين ماجاء منهم احد
نقول الغايب عذره معه ونتظر الشباب

[وجودك يكفي]

عطهم فرصة يالادميرال عطهم فرصة
وبصراحه اللغز بسيط ولكن أقول مثل ماقال الأسطورة والشاعر الكبير أبوهليل يوم يقول:
‏ ‏ ‏
دريتوا مادريتوا ماني بمسؤول
قدامكم هاللغز فكوا رموزه

[الأدميرال]

صح لسان ابو هليل

دريتوا مادريتوا ماني بمسؤول
قدامكم هاللغز فكوا رموزه

[ابوخديجة]

كيف الحال يا الربع

اظن والله العالم انه القصيد

[إبن ثعلي]

حظيتي والعالم الله انه منظار الطبيب

[وجودك يكفي]

كيف الحال يا الربع

اظن والله العالم انه القصيد
هلا بك يابوخديجة ومالك لوا...

[وجودك يكفي]

حظيتي والعالم الله انه منظار الطبيب

هلابك يابوعبدالرحمن

ومنظار الطبيب مالك لوا..

[الأدميرال]

يابو عبدالرحمن رحت بعيد كل الغاز وجودك من القرآن الكريم وشد حيلك
وبالتوفيق للجميع

[إبن ثعلي]

اللغز هذا ماهو في مستوى الغاز ولد ثابت المعهوده وواضح انه استعجل فيه ووداه لديرة صدام وصام في اخره والظاهر ان حله عند شيخ الشيوخ بس هو وينه الليله؟

[الأدميرال]

تراه ابسط من لغز الجزيره
وبنتظار شيخ الشيوخ ومدهال

[مدهـال]

هلا بك ياوجودك يكفي اثرك تهدد من امس وانا مادريت على العموم

هذي رمعه مبدئيه


وش تعني لك هالصوره

http://www5.0zz0.com/2009/06/17/05/721445861.jpg

ماتعني لك شي

[الأدميرال]

بنتظار وجودك ونشوف وش تعني الصوره

[ރالزيــاديރ]

‏
[/color][/size]


والله الظاهر انها سماويه لكن تفكيري ذهب للقصاص


ويش الذي ينفعك ويمكن يدينك=يمشي بامر غيره ولايملك اقدام

ممكن انه يكون معك ويمكن يكون ضدك
والقاضي هو من يحكم بالشرعيه

واحد من عياله تشوفه بعينك=وله ورع قالوا لي من ديار صدام

السيف تشوفه بعينك وولده الثاني حبل المشنقه اللي أُعدم به صدام

وبنته على رجال دايم يعينك=بالوزن ماتنزل وتطلع لها احكام

وبنته القضيه التي تُوكل لمحاميك

وعياله الباقين بيني وبينك=ماجالهم طاري ولغزي ترى صام

هنا لم أجد تفسير[/QUOTE]

ولكن شرف محاوله على الطاير

ولاهنت ياولد ثابت فأنت بصراحه جعلت من منتدى الالغاز من افضل الاقسام لي

تحياتي لك

[الأدميرال]

الزيادي مجتهد فيه وانا اقول حله اقرب الظاهر وانا مدري

[وجودك يكفي]

اللغز هذا ماهو في مستوى الغاز ولد ثابت المعهوده وواضح انه استعجل فيه ووداه لديرة صدام وصام في اخره والظاهر ان حله عند شيخ الشيوخ بس هو وينه الليله؟

ههههههه لاتحوص يالقاضي لاتحوص

وشد حيلك وانا اخوك

[ރالزيــاديރ]

طيب وش رايكم بالقاضي

[وجودك يكفي]

مدهال حياك ربي ومالك لوا .. يالغالي

الزيادي حياك ربي وشهادتك وسام وفخر لي وانا اخوك

وبالنسبه للرمعه مالك لوا..يالغالي

[الأدميرال]

ابن ثعلي ومدهال ماجابوه بنتظار شيخ الشيوخ

[ރالزيــاديރ]

اللغز الحين مو تقولون للجميع بس الثلاثه مطلوبين بشكل رسمي

[وجودك يكفي]

اخوي الزيادي اللغز للجميع ومشاركتك شرف انت وجميع الاخوان وهي الهدف المنشود من طرح الالغاز

[الأدميرال]

الختم او الحاكم

[وجودك يكفي]

الختم أو الحاكم مالك لوا يالادميرال

[الأدميرال]

لغزك صعب واتوقع ما يحله الا خليجي نت او شيخ الشيوخ او ابو خديجه او فريح والله اعلم
هذا بعد ماشفت رمعة ابن ثعلي ومدهال والزيادي

[{ أبوفيصل }]

حضرنا الساعه السابعه صباحاً وشفت اللغز كايف
وجودك يكفي تسلم لنا دوم بفكرك الراقي وطرحك المميز
وانت والأخوان هنا قد سبقتونا بهذا المجال ولكن


البحث وانا اخوك كما يقولون جاري






خليجي نت

[{ أبوفيصل }]

صبحتوا بالخير دستور يااصحابنا

( الدستور ـ ـ أو هو النظام ) والله أعلم

[{ أبوفيصل }]

وجودك يكفي تراجعت عن الحل اللي فوق
بحكم الدستور من صنع الغرب مو بالدين ولاينفعنا بشيء لكن وش رايك

(( القرار ))




تحيتي لكم تحية محبه وتقدير

[وجودك يكفي]

حياك ربي ياخليجي نت وهلابك يالغالي وأشكرك على الإطراء الجميل وماعليك زود وانا اخوك


بالنسبه لرمعاتك مالك لوا..

[الأدميرال]

بيبطي والعرب يبطون
ماحلو لغزك المنشود
بالتوفيق يالربع

[وجودك يكفي]

بيبطي والعرب يبطون
ماحلو لغزك المنشود
بالتوفيق يالربع
ههههههه أنت إللي جنيت عليهم
واللغز هذا لعيونك يالادميرال
ومدام إنهم تناتفوا لغز الجزيرة اللغز هذا فازع له

[الأدميرال]

تسلم وانا اخوك ولاهنت
لغز الجزيره مخذ ساعتين
وهذا اللغز له يومين
وبالتوفيق لهم

[وجودك يكفي]

‏ ‏ ‏واحد من عياله تشوفه بعينك
واحد من عياله تشوفه بعينك
‏ ‏ ‏
وله ورع قالوا لي من ديار صدام

[وجودك يكفي]

هلا بك ياوجودك يكفي اثرك تهدد من امس وانا مادريت على العموم

هذي رمعه مبدئيه


وش تعني لك هالصوره

http://www5.0zz0.com/2009/06/17/05/721445861.jpg

ماتعني لك شي
‏ ‏ ‏
يقولون ليلى في العراق مريضة
ياليتي كنت الطبيب المداويا

أشهد إنك دااااهيه يامدهاااال ولايهون جميع الاخوان
لو إن رمعتك )الدواء( بعيده

ولكن دخلت للغز من العين الواضحه والمكان المناسب وحطيت تركيزك على ديار صدام

بصراحه البيت الثاني واضح جدآ

بالتوفيق للجميع

[ރالزيــاديރ]

اللغز من القرآن؟

علشان تكون رمعاتنا تحت السماء

[وجودك يكفي]

اللغز من القرآن؟

علشان تكون رمعاتنا تحت السماء
جواب اللغز معروف لدى الجميع
والجواب ماهو خاص بالقرآن

[سعود بن سلمان]

ننتظر

[ރالزيــاديރ]

السلاح النووي

أو

او الدمار الشامل

[الأدميرال]

سلام
يالله حيهم
زل الشتا وقبل الصيف ولغز محد فقع عينه
الله يسهله عليهم
وجودك خشمك ياذيبان

[وجودك يكفي]

ننتظر
هههههههههه وش تنتظر؟؟

[وجودك يكفي]

السلاح النووي

أو

او الدمار الشامل



مالك لوا .. يالزيادي

[وجودك يكفي]

سلام
يالله حيهم
زل الشتا وقبل الصيف ولغز محد فقع عينه
الله يسهله عليهم
وجودك خشمك ياذيبان
عليكم السلام

هلااااااا وغلااااااا بالادميرال
ومتى ماطاب خاطرك عطني خبر عشان اسدح الشرح قدام الجميع

واللغز جاهز شرحه قبل طرحه


الراي عندك يالادميرال

[الأدميرال]

العين ماتعلا على الحاجب وانا اخوك
خله لين الربع يذتسونه ولا يقولون استسلام

[إبن ثعلي]

الخط العربي,واحد من عياله من ديار صدام وهو النوع الكوفي وبنته ريشة القلم وهو الرجل الذي يعينك وباقي العيال اللي ماجاء لهم ذكر ا ي شئ يمكن يكتب به غير ابرة القلم

[سعود بن سلمان]

هههههههههه وش تنتظر؟؟

انتظرتك وانتظرتك

وانتظرت

الحل

[{ أبوفيصل }]

صح لسانك ماشاء الله
هيّ يابن ثعلي سته على سته ياعنك انّك ذكيته ذكاه لين سال حبره
انا ما أبعد برمعتي له غيرالشطراللي يقول ،، بالوزن ماتنزل وتطلع لها احكام

انتظر الرد من وجودك يكفي

[وجودك يكفي]

الخط العربي,واحد من عياله من ديار صدام وهو النوع الكوفي وبنته ريشة القلم وهو الرجل الذي يعينك وباقي العيال اللي ماجاء لهم ذكر ا ي شئ يمكن يكتب به غير ابرة القلم
صح لسانك وبيض الله وجهك يابن ثعلي وهذا أبن ثعلي إللي أنا اعرفه
ما شاء الله تبارك الله


حصل عندك مشكله في البيت الثالث وقلت إن البنت هي ريشة القلم
ومايهم مدام إنك جبت الحل 100% هذا هو المطلوب




وبطرح لكم الآن اللغز وشرحه


ويش الذي ينفعك ويمكن يدينك=يمشي بامر غيره ولايملك اقدام

واحد من عياله تشوفه بعينك=وله ورع قالوا لي من ديار صدام

وبنته على رجال دايم يعينك=بالوزن ماتنزل وتطلع لها احكام

وعياله الباقين بيني وبينك=ماجالهم طاري ولغزي ترى صام


الجواب هو ‏ ‏ ‏
الخط

خط الكتابه

‏ ‏ ‏
الشرح


ويش الذي ينفعك ويمكن يدينك
الشطر هذا واضح ومايحتاج شرح


يمشي بامر غيره ولايملك اقدام
الخط يمشي على الورق والصفحه بأمر الخطاط والكاتب ولايملك رجل وقدم


واحد من عياله تشوفه بعينك
وانت تقرأ اللغز تشوف نوع من انواع الخط وهو خط النسخ


وله ورع قالوا لي من ديار صدام
الخط الكوفي أساسه من الكوفه والكوفه مدينة في العراق


وبنته على رجال دايم يعينك
بالوزن ماتنزل وتطلع لها احكام
بنته هي الرقعه على السطر والسطر يعينك في المحافظه على استقامة الخط
وذكرت الرقعه بانها على السطر لأنها تختلف عن باقي الانواع وتكون الحروف على السطر بالضبط
وتعريف الرقعه بأن الحروف على السطر
وتعريف النسخ يكون نصف الحرف فوق السطر والنصف الآخر تحت السطر وجميع الانواع تختلف عن الرقعه



وعياله الباقين بيني وبينك=ماجالهم طاري ولغزي ترى صام
عيال الخط الباقين لم أذكرهم في اللغز وهم الثلث والفارسي والاندلسي والديواني والريحاني وغيرهم



انتهى الشرح

اشكر جميع من شارك واقول الله يعطيكم العافيه



دمتم كما تحبون

[وجودك يكفي]

صح لسانك ماشاء الله
هيّ يابن ثعلي سته على سته ياعنك انّك ذكيته ذكاه لين سال حبره
انا ما أبعد برمعتي له غيرالشطراللي يقول ،، بالوزن ماتنزل وتطلع لها احكام

انتظر الرد من وجودك يكفي
ههههههههه إي والله ذكاه وانا اخوك
وملاحظتك صحيحه ياخليجي نت
ولآ هنت يالغالي على التواجد الرائع والمميز


احترامي

[الأدميرال]

ماشالله عليك يا ابن ثعلي ان اخطيت الاوله ماتخطي الثانيه
وجودك لاهنت وانا اخوك على طرحك للغز الي حيرهم ثلاثة ايام
وكنت اتمنى شيخ الشيوخ كان موجود والغايب عذره معه ومايشوف شر
خليجي نت ابو خديجه مدهال الزيادي والي ينتظر وجميع من شارك خيرها بغيرها
ولاهنتو

[شيخ الشيوخـ]

الى كبرت على الاجواد هانت :)

بيض الله وجهك ياقاضينا عز الله سديتناه والله ان راسي يعورني من هاللغز
ياااااااااوك


<< ماشالله على راعيه ( لايطلعون علينا اشاعات )

[وجودك يكفي]

الى كبرت على الاجواد هانت :)

بيض الله وجهك ياقاضينا عز الله سديتناه والله ان راسي يعورني من هاللغز
ياااااااااوك


<< ماشالله على راعيه ( لايطلعون علينا اشاعات )

ههههههههههههههه
أنا ماطلعت أشاعات ولاقلت شي!!!

[إبن ثعلي]

مشكورين جميعا على عباراة الإطراء واللغز مذكيه صاحبه من يوم قال واحد من اعياله من ديار صدام رحت ادور هذا الولد اللي من ديارصدام حتى وجدته0ولوخليت ياولد ثابت بنته ريشة القلم فهي على راس رجال يعين0وموزونه لاتنقص ولاتزيد وتصلح حل حتى لولم تكن من جنس اللغز فالمسألة الغاز
وتحياتي لكم

[إبن ثعلي]

والا ويش رايك ياوجودك يكفي تغير بنته وتخليها امه حتى تركب على ابرة القلم مية على ميه بحيث يكون البيت هكذا

وامه على رجال دايم يعينك=بالوزن ماتنزل ومحكمة احكام

[وجودك يكفي]

يابوعبدالرحمن لو حطيت البيت الثالث عن ريشة القلم بأنها أم للخط يصير اللغز غير متناسق وتسبب الأبيات تشتيت لذهن القارئ لأن اللغز يتحدث عن الخط وأنواعه
ويصير البيت الاول عن الخط
والبيت الثاني عن نوعين من انواع الخط
والبيت الثالث عن أم الخط وجايز تكون يد الخطاط هي الام وجايز تكون الصفحة أو الصحيفة أو الورقة هي الام
وتخيل كيف أقدر اجيب البيت الرابع وأرجع لذكر أنواع الخط مره أخرى


ولكن لو كان البيت الاول عن الخط
والبيت الثاني عن نوعين من أنواعه
والبيت الثالث عن نوع ثالث ومهم
والبيت الرابع عن تنويه وإحاطه بأن هناك أنواع لم تذكر في اللغز

من وجهة نظري بالطريقة هذي وبالتنسيق هذا يكون افضل

وبما إن اللغز عن الخط وأنواعه فمن الضروري التطرق لخط الرقعه لأنها بنته الوحيده ولو تلاحظ جميع أنواع الخط تجد الاسماء اسماء ذكور ماعدا الرقعه هي الوحيدة التي لها أسم مؤنث فمن الضروري ذكرها<<حرام نذكرهم ونتركها يزعجونا حقين حقوق المرأه


وللمعلوميه كتبت اللغز وكان عبارة عن الابيات الاولى الثلاث ولكن من الممكن أن يتبادر لذهن القارئ أن الرجل المطلوب له ولدان وبنت فقط وبالطرقة هذي يفكر الواحد بشي محصور له عدد معين
وأضفت البيت الرابع لكمال اللغز وحبكه من جميع النواحي


لو تخيلنا اللغز بدون آخر بيت
يجي واحد ويقول أنت حصرت الخط على ثلاث أنواع فقط مع أن له اكثر من ذلك


أتمنى أن تكون وجهة نظري واضحه
ومثل ماقلت يابو عبدالرحمن المجال واسع في ذلك والمسأله ألغاز ولها طرق عدة


أحترآآآآمي

[وجودك يكفي]

بقولكم شي صار معي وانا أكتب اللغز

بصراحة أنا بنيت اللغز على شطر
وله ورع قالوا لي من عيال صدام

فكان هذا الشطر هو أساس فكرة اللغز عندما خطرت ببالي الفكرة

وبنيت الأبيات كلها على هذا الشطر وبعد ما أنتهيت من اللغز واعجبني قلت في نفسي الشطر حق ديار صدام واضح جدآ بشوف له طريقه ثانيه
وبعدها جلست أضحك وقلت والله ما أغيره مدام إن الشطر هذا اساس الفكرة وكاتب الابيات كلها عشانه



وأصلآ لابد أن يكون للغز مفتاح فصار الشطر هذا اساس الفكرة والابيات كلها مبنيه عليه وفي نفس الوقت صار هو مفتاح اللغز
وتركته كما هو