لغز...الأبطـــال... )حصري( توصل للحل ]روقي قرم [

[وجودك يكفي]

مســـاء الخـــير


اللغز هذا كتبته اليوم وتراه بأستلامكم ياعشاق الألغاز ولا ترحمونه


يقول:


كتبت لي لغزٍ على كيف الابطال=للـّــه در إللي يحَــسمه برمعه

انشدك عن رجال له ستة عيال=ومره ثمان ومره يجون سبعه

وترى منازلهم ثلاثه على البال=واكبرهم الثالث سكن فيه قطعه

مايثبتون بحال مهما الزمن طال=والرجل مشهورٍ ومعروف طبعه


*ملاحظه*



بما إن اللغز يسأل عن رجل معين ومعروف بأسمه فأرجوا من الاعضاء الابطال ذكر اسم الرجل بصريح العبارة وكيف يكون له سته اعيال ومره سبعه ومره ثمانيه وذلك لتكون الرمعه تدل عن فهم البطل للغز وايضآ لكي يكون ردي صريح وواضح



فأرجوا من الابطال الإجابه مع شرح البيت الأول على الأقل

فضلآ وليس امرآ








وجــــودك يكفي

الحقوق محفوظه لمنتدى عتيبه

[قلب الذهب]

حسافه ابوي نايم والا والله كان حله ..
إذا ماجاوبه احد لبكره والله ان ابوي يجيب حله

[وجودك يكفي]

نوم الهناء للوالد

والوالد بطل وانتي بنت البطل ياجود الاسعدي


بإنتظارك غدآ ياجود الاسعدي

هذا إذا ماجاب حله واحدن اشوفه متواجد في صفحة اللغز عسى عمره طويل وربي يحفظه

[قلب الذهب]

سلمت والله يجزاك خير على هالدعوه ويستجيب ...
والادميرال شكله بيحله شمعته الليله ضاويه ماهو غلبنا اول يغلبنا تالي >> مقهوره للحين من النتيجه :18:

[الأدميرال]

لاهنت ياوجودك على طرحك للغز الجميل البسيط الرائع

اتوقع الثريا

[وجودك يكفي]

لآ هنت يالادميرال

والثريا مالك لوا ..

[الأدميرال]

جاااااااااااااري
التفكير

[وجودك يكفي]

جاااااااااااااري
التفكير

جاااااري الإنتظار

[روقي قرم]

يطري علي الكواكب..

[وجودك يكفي]

الكواكب مالك لوا...

[روقي قرم]

المدرب واحتياطه

[وجودك يكفي]

المدرب واحتياطه مالك لو...<<قصدك دكة بدلاء الفريق

[غزال الرافدين]

نجوم الدب القطبي

[غزال الرافدين]

شكلها خطا <<<<< أكيد ولا

[وجودك يكفي]

نجوم الدب القطبي مالك لوا... يابنت عز

[روقي قرم]

سباق الخيل وأشواطـه..

[وجودك يكفي]

سباق الخيل واشواطه مالك لوا...

[شيخ الشيوخـ]

بيض الله وجهك وصح لسانك

ولي عودة

[روقي قرم]

وجودك..

ماهوب الكهـف وأصحابـه..

[غزال الرافدين]

الروقي بيض الله وجهك صح

[وجودك يكفي]

بيض الله وجهك وصح لسانك

ولي عودة

صح بدنك وانا اخوك

وبإنتظارك

[فهيد مقعد الرويس]

صح لسانك

ياولد ثابت

تسجيل حضور ولي عوده بأذن الله

[وجودك يكفي]

اصحاب الكهف مالك لوا...يالقرم
8
8
مالك لوا .. يابنت عز

[وجودك يكفي]

صح لسانك

ياولد ثابت

تسجيل حضور ولي عوده بأذن الله

صح بدنك يابو مقعد

بإنتظارك

[قلب الذهب]

الجواب هو .. اليـــووم ..
واذا ماكان اليوم الســاااعه ,,

[وجودك يكفي]

الجواب هو .. اليـــووم ..
واذا ماكان اليوم الســاااعه ,,

هلا ياجود بنت البطل
اليوم أو الساعه
مالك لوا...

[غزال الرافدين]

أغششكم وأقربه لكم

[قلب الذهب]

طيب الوقت ولو اني احسه غلط بس يمكن

[الأدميرال]

اتوقع يكون عدد الضغط حق السياره

[وجودك يكفي]

طيب الوقت ولو اني احسه غلط بس يمكن

الوقت مالك لوا .. ياجود

[وجودك يكفي]

اتوقع يكون عدد الضغط حق السياره

مالك لوا .. يالادميرال

[وجودك يكفي]

بما إن اللغز يسأل عن رجل معين ومعروف بأسمه فأرجوا من الاعضاء الابطال ذكر اسم الرجل بصريح العبارة وكيف يكون له سته اعيال ومره سبعه ومره ثمانيه وذلك لتكون الرمعه تدل عن فهم البطل للغز وايضآ لكي يكون ردي صريح وواضح



فأرجوا من الابطال الإجابه مع شرح البيت الأول على الأقل

فضلآ وليس امرآ

[روقي قرم]

اللغز حليتـه ياوجودك...

التاريخ

على سبيل المثال اليوم 28-2-1430<7 خانات
وعلى سبيل المثال 28-10-1430<8 خانات
على سبيل المثال 8-1-1430<6 خانات
ومايجي غيرر هالكلام..
وهوو في ثلاث منازل
يوم
شهر
سنـه < والسنه اكبرهم

نعم والتاريخ لايمكن ان يرجع لاراح راح
وبالتوفيق مع لغز جديد

[إبن ثعلي]

خلها الأرقام بدلاً من الخانات حتى تكون عيال لأن الخانات بنات
ومؤيد لحلك ياروقي قرم عز الله انك قرم ونشوف ولد ثابت ويش يقول

[وجودك يكفي]

بيض الله وجهك يالروقي القرم وصح لسانك جوابك صحيح وما شاء الله عليك
وصح لسانك يا إبن ثعلي ومثل ماقلت يابو عبدالرحمن



معا إن الروقي القرم شرح شرح وافي وإبن ثعلي اضاف للشرح تعديل رائع اسمحوا لي اشرح الابيات بالكامل



الشرح

انشدك عن رجال له ستة عيال
الرجل هو التاريخ الهجري أو الميلادي وعياله الارقام السته

1 / 1 /1431


ومره ثمان ومره يجون سبعه

ثمان
18 / 11 / 1431
سبعه
11 / 5 /1431
أو
5 / 11 / 1431


وترى منازلهم ثلاثه على البال
المنازل والخانات الثلاث التي تكتب بداخلها أرقام التاريخ
منزل1 /منزل2 /منزل3

واكبرهم الثالث سكن فيه قطعه
المنزل الثالث يحتوي على أربعة ارقام وهو اكبر المنازل والخانات الثلاث

مايثبتون بحال مهما الزمن طال
أرقام التاريخ تتغيير وتزيد مع مرور الايام

والرجل مشهورن ومعروف طبعه
التاريخ مشهور عند الكل ولا يجهله إنسان
ومعروف طبعه
‏أي أنه لا بد أن يتغيير ولا يثبت على ارقام معينه ومعروف طريقة تدوينه وطريقة حسابه وايضآ معروف طبعه أي كتابته وطبعه على الجرايد والتقويم والشهادات والاوراق الرسمية....... إلخ


انتهى الشرح

لآ هنت يالروقي القرم ولآهنت يابن ثعلي وأشكر جميع من شارك في اللغز والله يعطيكم العافيه


لكم ودي واحترامي

[غزال الرافدين]

مبروك ياروقي >>> الحين أنا أيش قايله لك أذا عرفت شي بلغني الله يهداك نسيت الوعد

[فهيد مقعد الرويس]

صح لسانك

ياروقي قرم

ولاهنت ياولد ثابت

تحيتي وتقديري

[شيخ الشيوخـ]

روقي قرم بيض الله وجهك

وبيض الله وجهك ياولد ثابت لغز محبوك على اعلى مستوى

[الأدميرال]

مبروك ياروقي قرم وانت البطل