تكفى ياأخو نورره

[زيزفونة شمر]

ياليتني مستشار بمجلس الشوره
لنّي معايش حياة الفقر بالذاتي


أخاف ربي قبل ما تِكشف العوره
وأصدع بصوت المواطن عند قاداتي


يمكن ما حد وصّل لراس الملك صوره
عن بعض شعبه قليلين المعاشاتي


أقول ياسيدي به ناس مقهوره
والحال يعلم بها رب السمواتي


مع ان أراضيّنا بالخير مغموره
ونصدر النفط حتى للولاياتي


ماباقي ألاّ تغدا الظهر شابوره
بعد أرتفع قوتنا غير العقاراتي


كم واحد(ن) راتبه مايكفي بزوره
نتيجة القرض وعقود الاجاراتي


كم عسكري ناشب الديان في زوره
مع انه يبيع عمره بالمهماتي


وبه ناس لو تنكسر بالبيت ماسوره
راحت ترجى العماله بالمحلاتي


من قلّ ما تملكه واليد مقصوره
قامت ترجى على حساب الكراماتي


وعيالهم للوظايف تنتظر دوره
متوسدين(ن) ملفات الشهاداتي


اذا هل المال بالميلان مسروره
وتشيّد الدور بحدود المحيطاتي


وطاروا بسعر البعير ولاعب الكوره
من الّفسق وصلوهم للمجراتي


قولو لهم به خواطر ناس مكسوره
كم شايب(ن) من ردات الحال ماباتي


أنا هنا الشاعر اللي ينقل الصوره
لن المواطن معاناته معاناتي


لا بارك الله بشعر(ن) مايجي ثوره
وخلك على جنب ياشعر الخيالاتي


تكفى يا ابو متعب أفزع وين أخو نوره
من يرتكي غير شخصك للثقيلاتي


ألا أبو خالد رجل وقفات مذكوره
وين انت وين انت ياجزل العطياتي


انتم لنا ياضهدنا الوقت بعسوره
وحنا لكم ياملكنا بالصعيباتي






م/ن

[..{غ ـير البشـ}ـر..]

صح


لسااااااااااااااانك


والله قصيده ة جزله

ومعااااااااانيها بالواقع صايره



يعطيك الف عاااااافيه

[فهيد مقعد الرويس]

لا بارك الله بشعر(ن) مايجي ثوره
وخلك على جنب ياشعر الخيالاتي


تكفى يا ابو متعب أفزع وين أخو نوره
من يرتكي غير شخصك للثقيلاتي


ألا أبو خالد رجل وقفات مذكوره
وين انت وين انت ياجزل العطياتي


انتم لنا ياضهدنا الوقت بعسوره
وحنا لكم ياملكنا بالصعيباتي

الله يطول في عمارهم

هذا والله الكلام

صح السان شاعرها ملايين

ولاهنت على النقل يازيزفونة شمر

نقل رائع جدا

اطيب تحيه

[مـثـايـل]

وطاروا بسعر البعير ولاعب الكوره
من الّفسق وصلوهم للمجراتي


قصيده روووعـه تلامس الواقع اللي عايشينه ..


صح لسان قاايلها ..


ولاهنتِ يا زيزفونة شمر ..

[ناصر بن سعدي]

ياسلام على النقل المميز
والثاير .. والرائــع ..


لاهنتي أختي على النقل الجزل والرائــع ,,


تكفى يا ابو متعب أفزع وين أخو نوره
من يرتكي غير شخصك للثقيلاتي


وصــح لسان شاعرها ..

وياليت نعرفــه


وتقبلي خالص تحياتي ,,